ޕަބްލިކް ސަރވިސް މީޑިއާ (ޕީއެސްއެމް) ނިއުސްއަށް ދިގު މުއްދަތަކަށް ޚިދުމަތްކޮށްފައިވާ އަދި މިހާރުވެސް މަސައްކަތްކުރަމުންދާ 10 މުވައްޒަފަކަށް ޚާއްސަ އެވޯޑެއް މިއަދު ދީފިއެވެ.
މީގެއިތުރުން، 1446 ވަނަ އަހަރުގެ ރަމަޟާން މަހު ޕީއެސްއެމް ނިއުސްއިން ގެނެސްދިން ބައެއް ކޮންޓެންޓުތަކަށް އެހީތެރިކަން ފޯރުކޮށްދިން ފަރާތްތަކުގެ އަގުވަޒަންކޮށް، އެ ފަރާތްތަކަށްވެސް ހަނދާނީ ފިލާ ދީފައިވެއެވެ.
ޕީއެސްއެމް ނިއުސްގެ އެވޯޑު ޙަފްލާ ޝަރަފުވެރިކޮށްދެއްވީ ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަދި ގިނަ ދުވަސްތަކެއް ވަންދެން ނޫސްވެރިކަމުގެ ދާއިރާއަށް ޚިދުމަތްކުރައްވާފައިވާ ޢައްބާސް އިބްރާހިމެވެ. ޙަފްލާގެ ޚާއްސަ މެހެމާނެއްގެ ގޮތުގައި ވަޑައިގެންނެވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ.
މި އެވޯޑު ޙަފްލާގައި، ޕީއެސްއެމް ނިއުސްއިން ކޮންމެ އަހަރެއްގެ މުހިންމު ހާދިސާތަކަށް އަލިއަޅުވާލާ ޚާއްސަ ފޮތެއްވެސް ވަނީ އިފްތިތާޙުކޮށްފައެވެ. "ނިމުނު 52" ހަފްތާގެ ނަމުގައި ނެރޭ މި ފޮތުގައި ވޭތުވެދިޔަ އެއް އަހަރު ދުވަހުގެ ތެރޭގައި ރާއްޖޭގައި ހިނގި މުހިންމު ޚަބަރުތަކުގެ ތަފްޞީލު ހިމެނިފައިވާނެއެވެ.
ޕީއެސްއެމް ނިއުސް އެވޯޑްސްގައި ގިނަ ދާއިރާތަކަކުން އެވޯޑު ދީފައިވެއެވެ. އެގޮތުން އަހަރުގެ އެންމެ މޮޅު މުވައްޒަފަކަށް ހޮވިފައިވަނީ ސީނިއަރ ނިއުސް އެޑިޓަރ ޢަބްދުﷲ މުޢާޛެވެ. އެންމެ މޮޅު ނިއުސް ޕްރެޒެންޓަރގެ އެވޯޑުވެސް މުޢާޛަށް ލިބުނުއިރު، އެންމެ މޮޅު ނިއުސް އެންކަރގެ އެވޯޑު ލިބުނީ ސީނިއަރ ނިއުސް އެޑިޓަރ ޙަފީޒާ ޢަބްދުއްސައްތާރަށެވެ.
މި ޙަފްލާއަކީ ޕީއެސްއެމް ނިއުސްގެ މުވައްޒަފުންގެ ހިތްވަރާއި ވަފާތެރިކަން ފާހަގަކޮށް، އެ ފަރާތްތަކުގެ މަސައްކަތުގެ އަގު ވަޒަންކުރުމަށް ބޭއްވުނު ޚާއްސަ ޙަފްލާއެއް ކަމަށް ޕީއެސްއެމުން ބުނެއެވެ.
