ދައުލަތުގެ އިސްވެރިއަކު އެންމެ ގިނަ އިރު ވަންދެން ބޭއްވެވި ނޫސްވެރިންގެ ބައްދަލުވުމުގެ ދުނިޔޭގެ ރެކޯޑެއް ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދި ދެންމެއަކު މުގުރާލައްވައިފިއެވެ. އެމަނިކުފާނު މުގުރާލެއްވީ ޔުކްރޭނުގެ ރައީސް ވޮލޮޑިމިއާ ޒެލެންސީގެ ރެކޯޑެވެ.
ބައިނަލް އަޤްވާމީ ނޫސްވެރިކަމުގެ މިނިވަންދުވަހު (މިއަދު) ހެނދުނު 10:00 އިން ފެށިގެން ކުރިޔަށްދާ ނޫސްވެރިންގެ ބައްދަލުވުން އަދިވެސް ކުރިޔަށްދާއިރު މިހާރު 14 ގަޑިއިރަށް ވުރެ ގިނަ އިރު ވެއްޖެއެވެ.
ޒެލެންސްކީ ވަނީ 2019 ވަނަ އަހަރު 14 ގަޑިއިރުގެ ދިގު ނޫސްވެރިންގެ ބައްދަލުވުމެއް ކީވްގައި ބާއްވާފައެވެ. ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނޫސްކޮންފެރެންސް 14 ގަޑިއިރަށްވުރެ ދިގު ވެއްޖެއެވެ.
“ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް”މިއަދު ފާހަގަކުރާއިރު، ބޯހިޔާވަހިކަމާއި އިޤްތިޞާދީ އިޞްލާޙްތަކުން ފެށިގެން ލާމަރުކަޒީ ނިޒާމާއި ފަތުރުވެރިކަމާއި ސަރަޙައްދީ ހަމަޖެހުމާ ހަމައަށް ރައީސް ގެންދަވަނީ ވަރަށް ވެސް ފުޅާ ދާއިރާއެއްގައި ނޫސްވެރިންނަށް މަޢުލޫމާތު ދެއްވަމުންނެވެ. އެގޮތުން އެކި މައުޟޫއުތަކެއް ހިމެނޭ އެތައް ސަތޭކަ ސުވާލެއްގެ ޖަވާބު ރައީސް ޑރ. މުޢިއްޒު ވަނީ ދެއްވާފައެވެ.
"މިއީ ހާމަކަން ބޮޑުކަމާއި، އޯޕަންނެސް، އަދި އިތުބާރުގެ ވާހަކަ. ރައީސް އެ ހުންނެވީ ހުރިހާ ކަމަކަށް ޖަވާބުދާރީވާން، އެކަމަށް ނަގާހާ ދުވަހަކު އެމަނިކުފާނު ވަރުބަލިކަމެއް ނެތި މަޢުލޫމާތު ދެއްވާނެ،" ރައީސް ޑރ. މުޢިއްޒުގެ ރެކޯޑާއި ބެހޭގޮތުން ދެންމެ ރައީސް އޮފީހުގެ އޮފިޝަލަކު ވިދާޅުވި އެވެ.
ޒެލެންސްކީގެ ރެކޯޑް ރައީސް ޑރ. މުޢިއްޒު މުގުރާލެއްވިއިރު އެމަނިކުފާނަކީ ދުނިޔޭގައި އެންމެ ގިނައިރުވަންދެން ނޫސްވެރިންނާއި ވާހަކަދެއްކެވި ލީޑަރުކަމެއް ސީދާ ކަށަވަރެއް ނުވެއެވެ.
