މުހިންމު ބޭސްތައް ލިބުން ދަތިވީ ބައެއް ވިޔަވިޔަފާރިވެރިން ގަސްތުގައި ރާއްޖެއަށް ބޭސް އެތެރެކުރުން ހުއްޓާލުމުގެ ސަބަބުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ އެފަރާތްތަކުން ބޭސް އެތެރެކުރުން ހުއްޓާލީ ކުރިން ބޭސް ވިއްކަމުން ދިޔަ ބޮޑު އަގުގައި އެމީހުންނަށް ރާއްޖޭގައި ބޭސް ނުވިއްކޭނެ ގޮތް ހެދުމުންނެވެ.
ރައީސް ވިދާޅުވީ ސަރުކާރުން އާސަންދަ ނިޒާމު އިޞްލާޙުކުރުމަށް ބޭހުގެ އަގު ކެޕްކުރުމުން، ބައެއް ވިޔަފާރިތަކުން ބޭސް އެތެރެކުރުން ހުއްޓާލިއިރު، މީގެ ކުރިން ބައެއް ކުންފުނިތަކުން އާސަންދަ ނިޒާމުގެ ތެރެއިން ހާހެއްހައި ޕަސެންޓުގެ ފައިދާ ނަގަމުން ދިޔަ ކަމަށެވެ.
މި މައްސަލަ ހައްލުކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި އެސްޓީއޯއިން މިހާރު 784 ބާވަތުގެ ޖެނެރިކް ބޭސް ލިބެން ހުންނާނެކަން ރައީސް ފާހަގަ ކުރެއްވިއެވެ. 10 ބޭހެއް ފިޔަވައި، އަސާސީ ހުރިހާ ބޭހެއް އެސްޓީއޯއިން ލިބޭނެކަމަށާއި އަމިއްލަ ކުންފުނިތަކުން ވިއްކާ 77 ބޭހެއްގެ އަގު ރިވައިޒްކޮށް މިރޭ އަމަލުކުރަން ފަށާނެކަން އެމަނިކުފާނު ފާހަގަ ކުރެއްވިއެވެ.
ރައީސް މުޢިއްޒު ވަނީ އިންތިޚާބުގެ ވަޢުދަޢުދުތަކުގެ ތެރޭގައި ބޭހުގެ އަގުތައް ހަމައަގަށް ތިރިކޮށް މެޑިކަލް މާފިއާ ހުއްޓުވުމާއި އާސަންދަ އިޞްލާޙުކުރުން ހިމަނުއްވާފައެވެ.
