އިސްރާއީލް ޕާސްޕޯޓު މަނާކުރުމަކީ ރާއްޖޭގެ ތާރީޚުގައި ނިންމުނު ފަޚުރުވެރި ނިންމުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

މި ސަރުކާރުގެ ޚާރިޖީ ސިޔާސަތަކީ "މޯލްޑިވްސް ފަސްޓް ޕޮލިސީ" ކަމަށާއި، މި ސިޔާސަތުގެ އަސާސަކީ ހުރިހާ ހާލަތެއްގައިވެސް އިސްކުރާނީ ދިވެހިންގެ މަޞްލަޙަތު ކަމަށާއި، ދިވެހިންގެ މިނިވަންކަމާއި ސިޔާދަތީ ބާރު ހިމާޔަތްކޮށް ދެމެހެއްޓުން ކަމަށްވެސް އެމަނިކުފާނު ވިދާޅުވިއެވެ.

އިސްރާއީލުގެ ޕާސްޕޯޓު މަނާކުރުމަށް ނިންމި ނިންމުމަކީ މި ސަރުކާރުގެ ޚާރިޖީ ސިޔާސަތުގެ ތެރެއިން އެޅުނު މުހިންމު ފިޔަވަޅެއްގެ ގޮތުގައި ރައީސް ފާހަގަކުރެއްވިއިރު، މިސަރުކާރުން އިސްރާއީލް ބޮއިކޮޓް ކުރުމުގެ ސަބަބުން އިސްރާއީލުން ވަނީ އެގައުމުގެ މީހުން ރާއްޖެއަށް ދަތުރު ނުކުރުމަށް ގޮވާލާފައެވެ.

ޒައެނިސްޓް އިސްރާއީލުގެ ވެރިކަމާއި ދެކޮޅަށް ދިވެހި ރައްޔިތުން އަޑުއުފުލާފައިވާއިރު ބޭރުގެ ނުފޫޒުތަކަށް މިރާއްޖެ ދީލާނުލާނެ ކަމަށާއި ރާއްޖެއިން އަބަދުވެސް ތިބޭނީ ފަލަސްޠީނު ރައްޔިތުންގެ ޙައްޤުގައި ކަމަށްވެސް އެމަނިކުފާނު ވިދާޅުވިއެވެ.

ރައީސް މުޢިއްޒު ވަނީ ފަލަސްޠީނުގައި މިނިވަން ދައުލަތެއް ޤާއިމުކުރުމަށާއި އދ.ގެ ފުރިހަމަ މެންބަރުކަން ފަލަސްޠީނަށް ދިނުމަށް ގޮވާލައްވާފައެވެ. މިއީ ބައިނަލްއަޤްވާމީ މަންޞަތަކުގައި ފަލަސްޠީނުގެ ޙައްޤުގައި ރާއްޖެއިން ކުރަމުންދާ މަސައްކަތްތަކުގެ ތެރެއިން ކަމެއް ކަމަށް ރައީސް ވިދާޅުވިއެވެ.