މާލެއާއި ވިލިމާލޭގެ މަގުތައް ހެދުމުގެ މަސައްކަތް މި އަހަރުތެރޭ ފެށޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. ނޫސްވެރިންނާއި ބައްދަލުކުރައްވައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ހައުސިންގ މައްސަލައަށްފަހު ރައްޔިތުންނަށް އެންމެ އުނދަގޫވާ މައްސަލައަކީ މަގުތަކުގެ މައްސަލަތައް ކަމަށެވެ.
ރައީސް ވިދާޅުވި ގޮތުގައި މާލެއާއި ވިލިމާލޭގެ މަގުތައް ހެދުމުގެ މަޝްރޫޢު ކުރިއަށްގެންދަނީ ޗައިނާގެ އެހީގައެވެ. މި މަޝްރޫޢުގެ ފީސިބިލިޓީ ސްޓަޑީ ނިންމައި ރިޕޯޓް ހުށަހަޅާފައިވާ ކަމަށާއި، ދެން އަންނަ މަރުހަލާގައި ޗައިނާގެ ފަރާތްތައް ރާއްޖެ ވަޑައިގަންނަވާނެ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، ބޭރުމަގު ތާރުއެޅުމުގެ މަސައްކަތް ވަކިން ކުރިއަށްދާ ކަމަށް ރައީސް ފާހަގަކުރެއްވިއެވެ. އެގޮތުން، މިހާރު ތާރު އަޅާފައިވާ ހިސާބުން ފެށިގެން އެމްއެމްއޭއާ ހަމައަށް ތާރު އެޅުމުގެ މަސައްކަތް އެމްޓީސީސީއާ ހަވާލުކޮށްފައިވާ ކަމަށާއި، ސާރވޭގެ މަސައްކަތް ނިމުމުން މަހެއްހާ ދުވަހުގެ ތެރޭގައި މަސައްކަތް ފެށޭތޯ ބަލަމުންދާ ކަމަށް ވިދާޅުވިއެވެ. ބޭރުމަގު ތާރު އެޅުމަށްފަހު އެ މަގު ފުޅާވެ، ދެ ލޭނު އެޅުމަށް ހަމަޖެހިފައިވާ ކަމަށްވެސް ރައީސް ހާމަކުރެއްވިއެވެ.
މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢު ކުރިން ނިންމާފައި އޮތީ ސަރުކާރުގެ ބަޖެޓުން ކުރިއަށްގެންދަން ކަމަށާއި، ނަމަވެސް ރައީސް މިދިޔަ އަހަރުގެ ޖެނުއަރީ މަހު ޗައިނާއަށް ކުރެއްވި ދަތުރުފުޅުގައި، މި މަސައްކަތް ޗައިނާގެ ހިލޭ އެހީގެ ދަށުން ކުރިއަށްގެންދިއުމަށް ނިންމާފައިވާ ކަމަށް އެމަނިކުފާނު ވިދާޅުވިއެވެ.
މާލޭގެ މަގުތަކުގައި ތާރުއެޅުމުގެ މަސައްކަތް ފުރަތަމަ ފެށިފައިވަނީ ވެސް އެމަނިކުފާނު ހައުސިންގ މިނިސްޓަރުކަމުގައި ހުންނެވިއިރުއެވެ. އޭރު އިންޑަސްޓްރިއަލް ވިލެޖު ސަރަހައްދުން ފެށިގެން އެމްޓީސީސީ ފެރީ ޓަރމިނަލްއާ ހަމައަށް ތާރު އަޅާފައިވާ ކަމަށް ރައީސް ފާހަގަކުރެއްވިއެވެ.
