އެއްވެސް ދިވެއްސަކު މަސައްކަތެއް ނުކޮށް ބާކީވެގެން ދިއުމަށް ދޫކޮށްނުލުމަށް ގައުމީ މަސައްކަތްތަކެއް ފަށަންޖެހޭ ކަމަށް، ބައިނަލްއަޤްވާމީ މަސައްކަތްތެރިންގެ ދުވަހާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ދެއްވި ޚިޠާބުގައި ވިދާޅުވެއްޖެއެވެ.

އެމަނިކުފާނުގެ ޚިޠާބުގައި އިލްތިމާސް ކުރެއްވީ ކޮންމެ ކުއްޖަކީވެސް މަސައްކަތްތަކަށް އަހުލުވެރި، ހީވާގި ކުއްޖެއްގެ ގޮތުގައި ބޮޑުކުރުމަށް ޚާއްޞަ ސަމާލުކަމެއް ދިނުމަށެވެ.

ރައީސް ވިދާޅުވީ މުޅި މުޖުތަމަޢު ގުޅިގެން މި މަސައްކަތް ކުރަންޖެހޭ ކަމަށާއި، ދިވެހިން އެދޭ ތަމައްދުން ހާސިލުކުރެވޭނީ އޭރުން ކަމަށެވެ. މީގެ އިތުރުން، ރާއްޖޭގައި ކުރެވޭ އިޤްތިޞާދީ މަސައްކަތްތައް އިތުރުކުރުމަށާއި ވަޒީފާގެ ފުރުޞަތުތައް ގިނަކުރުމަށް މި ސަރުކާރުން ބޮޑު އިސްކަމެއް ދެމުންދާ ކަމަށްވެސް ވިދާޅުވިއެވެ.

ވަޒީފާ އަދާކުރާ ފަރާތްތަކަށް ލިބޭ އުޖޫރަ އިތުރުކުރުމާއި، އެކި ދާއިރާތަކުގެ ޚިދުމަތްތެރިން ދަފްތަރުކޮށް ހިޔާވަހިކަމުގެ ސްކީމްތަކާއި ބޭންކުން ލޯނު ލިބުން ފަދަ ކަންކަން ފަސޭހަކޮށްދިނުމަށް ސަރުކާރުން ފަށާފައިވާ މަސައްކަތަށް ބޮޑު ކާމިޔާބެއް ހޯދާނެ ކަމަށް ރައީސް މުއިއްޒު ވިދާޅުވިއެވެ.

އަދި ޤައުމަށް ފައިދާހުރި މަސައްކަތްތެރި އަތްތައް ގިނަކުރުމަށްޓަކައި، މަސައްކަތުގެތުގެ އަޚްލާޤާއި ހުނަރު ދަސްކޮށްދިނުން ތަޢުލީމީ މަންހަޖުގައި އިތުރުކުރަންޖެހޭ ކަމަށާއި، ވަޒީފާ އަދާކުރާ ބިދޭސީން ރަނގަޅަށް ބަލަހައްޓައި، ޤާނޫނު ތަންފީޛުކުރުމަށް ސަރުކާރުން ފަށާފައިވާ މަސައްކަތްތައް ހުއްޓުމެއްނެތި ކުރިއަށް ގެންދަންޖެހޭ ކަމަށްވެސް ރައީސް މުއިއްޒު ވިދާޅުވިއެވެ.