އިންޑިޔާގެ ޖުއްމޫ ކަޝްމީރުގައި ފަތުރުވެރިން ޒިޔާރަތްކުރާ ސަރަހައްދުގައި ކާކުކަން ނޭނގޭ ބަޔަކު ހިންގި ބަޑި ޖެހުމުގެ ޓެރަރިސްޓް ހާދިސާއެއްގައި 26 މީހަކު މަރުވުމާއި ގުޅިގެން އިންޑިޔާ ސަރުކާރުން ޕާކިސްތާނަށް ދެމުން އަންނަ އިންޒާރުތަކާއި ގުޅިގެން ޕާކިސްތާންގެ އަސްކަރިއްޔާ ހައިއެލާޓަށް ގެނެސްފައިވާކަމަށް ޕާކިސްތާނުގެ ދިފާޢީ ވަޒީރު ހަވާޖާ މުޙައްމަދު ޢާޞިފް ވިދާޅުވެފައިވާކަމަށް ރޮއިޓާރސްއިން ބުނެފައިވެއެވެ.

އިންޑިޔާ އިން ބުނާގޮތުގައި ކަޝްމީރުގައި ހިންގި ހަމަލާގައި ޕާކިސްތާނުގެ އަތެއް ވެއެވެ. އެހެން ނަމަވެސް ތުހުމަތާއި ގުޅޭ އެއްވެސް ހެއްކެއް މިހާތަނަށް އިންޑިޔާއިން ހާމަކޮށްފައެއް ނުވެއެވެ. ޕާކިސްތާނާއި އިންޑިޔާ ވަނީ ކަޝްމީރުގެ މައްސަލާގައި ކުރިން ވެސް ދެފަހަރެއްގެ މަތިން ހަނގުރާމަ ކޮށްފައެވެ.

މިފަހަރު ކަޝްމީރުގައި ހިންގި ހަމަލާ އާއި ގުޅިގެން ޕާކިސްތާނަށް ހަމަލާ ދިނުމަށް ހިންދޫ ހަރުކަށި ސިޔާސީ ޖަމާޢަތްތަކުން އަންނަނީ ސަރުކާރަށް ގޮވާލަމުންނެވެ. މިފަހަރު އުފެދުނު ހަމަނުޖެހުމުގައި ދެޤައުމުން ވެސް ވަނީ އެއްޤައުމު އަނެއްޤައުމަށް ދަތިކުރުމުގެ ގޮތުން ފިޔަވަޅުތަކެއް އަޅާފައެވެ. އެގޮތުން އިންޑިޔާ އިން ވަނީ ޕާކިސްތާނުގެ ރައްޔިތުންގެ ވިސާ ކެންސަލްކޮށް 48 ގަޑި އިރުގެ ތެރޭގައި ޕާކިސްތާނުގެ ރައްޔިތުން އިންޑިޔާއިން ފޭބުމަށް އަންގާފަ އެވެ. އަދި ޕާކިސްތާނުން ވެސް ވަނީ ، ސިކުން ފިޔަވައި އިންޑިޔާގެ ރައްޔިތުން ފޭބުމަށް އަންގާފަ އެވެ. އަދި ޕާކިސްތާނާއި އިންޑިޔާ ގުޅޭ ވަގާ ބޯޑަރު ބަންދުކޮށް އެލާޓަށް ގެނެސްފައިވެއެވެ.

ޕާކިސްތާނުގެ ދިފާޢީ ވަޒީރު ވިދާޅުވެފައިވަނީ ޕާކިސްތާނު ދެމިއޮތުމަށް ނުރައްކާ ވެއްޖެ ޙާލަތެއްގައި ނޫނީ ނިޔުކުލިޔަރ ހަތިޔާރު ބޭނުން ނުކުރާނެކަމަށެވެ. މި ދެޤައުމުގައި ހުރި ހަތިޔާރަށް ބަލާއިރު ޕާކިސްތާނުގައި ގިނައީ އެމެރިކާ ހަތިޔާރެވެ، އިންޑިޔާގައި ހުރީ ރަޝިޔާގެ ހަތިޔާރެވެ. ފައިޓަރ ޖެޓްތަކަށް ބަލާއިރު ވެސް ޕާކިސްތާނުގައި އެމެރިކާގެ އެފް 16 ގެ ބޯޓާއި ޗައިނާ އާއި ޕާކިސްތާން ގުޅިގެން އުފައްދާފައިވާ އިންޑިޔާއަށް ވުރެ ފެންވަރު ރަނގަޅު އެޑވާސް ބޯޓުތައް ހުރިކަމަށްވެއެވެ. މިދެޤައުމަކީ ވެސް ނިއުކުލިޔަރު ހަތިޔާރު ހުރި ދެޤައުމެވެ. އިންޑިޔާގައި މިހާރު އޮތް ސަރުކާރުން އިންޑިޔާގެ ޤާނޫނު އަސާސީ އާއި ޚިލާފަށް މުސްލިމުންނާއި މެދު ތަފާތުކޮށް ކަންތައްކުރާ ކަމުގެ ޝަކުވާ އިންޑިޔާގެ މުސްލިމުންނާއި ޕާކިސްތާނުގެ މުސްލިމުންނާއި ބައިނަލްއަޤުވާމީ ބައެއް އިދާރާތަކުން ކުރެއެވެ.

އެގޮތުން 500 ޤަރުނު ވެފައިވާ ބާބަރި މިސްކިތް ހުރިތަނުގައި ހިންދޫން ފައްޅިއެއް އެޅުމާއި، ކޮންމެ ދުވަހަކު ކަހަލަ ގޮތަކަށް މުސްލިމުންގެ މުދަލަށާއި ފުރާނައަށް ގެއްލުން ދިނުމުގެ ހާދިސާތައް ހިންދޫން ހިންގާ ކަމަށާއި، މުސްލިމުންގެ މިސްކިތްތަކަށް ވެސް ގެއްލުން ދިނުމުގެ ހާދިސާތައް ހިންގަމުން ދެއެވެ. އަދި ދާދި ފަހުން ޕާލަމެންޓުން ވަނީ، މުސްލިމުންގެ ވަޤުފު ބިންތަކާއި މުދާތައް ސަރުކާރުގެ ބެލުމުގެ ދަށަށް ގެނައުމާއި ގުޅޭ ބިލެއް ވެސް ފާސްކޮށްފައެވެ. އެމައްސަލަ މިހާރު ވަނީ ސުޕްރީމް ކޯޓަށް އިސްތިއުނާފް ކުރެވިފައެވެ. އެހެން ނަމަވެސް ބާބަރީ މިސްކިތް ތަޅާލި މައްސަލަ ވެސް ނިންމި ގޮތަށް ސަރުކާރާއި އެއްކޮޅަށް މިމައްސަލަ ވެސް ނިންމާފާނެތީ، މުސްލިމުން ތިބީ ކަންބޮޑުވުމެއްގެ ތެރޭގައި ކަމަށްވެއެވެ.

^{ނޯޓް: އާޓިކަލް ލިޔުއްވީ އަލްއުސްތާޛް ޢަލީ އާދަމް}