ކީ ސްޓޭޖް 3 ގެ ދަރިވަރުންނަށް އަމާޒުކޮށްގެން މުޅިން އަލަށް ބާއްވާ ނޭޝަނަލް އެސެސްމަންޓް އޮފް ލާނިން އައުޓްކަމްސް (ނާލޯ) އިމްތިހާން މިއަދު ފަށައިފި އެވެ.

އެޑިއުކޭޝަން މިނިސްޓްރީން ބުނީ އެ އިމްތިހާނުގައި ރާއްޖޭގެ 201 ސްކޫލަކުން 5،100 އަށް ވުރެ ގިނަ ދަރިވަރުން ބައިވެރިވެފައިވާ ކަމަށެވެ.

މިނިސްޓްރީން ބުނި ގޮތުގައި، 2008 ވަނަ އަހަރުން ފެށިގެން މުޅި ރާއްޖޭގައި ކުރިއަށް ގެންދާ ނާލޯގައި މީގެ ކުރިން ބައިވެރި ވަނީ ހަމައެކަނި ކީ ސްޓޭޖް 1 އަދި 2 ނިންމާ ދަރިވަރުންނެވެ. ނަމަވެސް މި އަހަރު، ފުރަތަމަ ފަހަރަށް، ކީ ސްޓޭޖް 3 އަދި ގްރޭޑް 7 އަދި 8 ނިންމާފައިވާ ދަރިވަރުން މި އިމްތިހާނުގައި ބައިވެރިވާނެ އެވެ.

މި އިމްތިހާނު ކުރިއަށް ގެންދާނީ ދެ ބުރަކަށް ބަހާލައިގެންނެވެ.

މިނިސްޓްރީން ބުނީ މިއަދު ފެށި، ތިން ދުވަހަށް ކުރިއަށް ގެންދާ ފުރަތަމަ ބުރުގައި ހިމެނެނީ އިނގިރޭސިބަހާއި ހިސާބު އަދި ސައިންސްގެ އިމްތިހާނުތައް ކަމަށެވެ. އަދި ސެޕްޓެމްބަރު 2 އަދި 3 ގައި ބޭއްވުމަށް ހަމަޖެހިފައިވާ ދެވަނަ ބުރުގައި އިސްލާމާއި ދިވެހިބަހުގެ އިމްތިހާނުތައް ކުރިއަށް ގެންދާނެ ކަމަށް މިިނިސްޓްރީން ބުންޏެވެ.

މިއީ، ނާލޯގައި އިސްލާމް މާއްދާ ހިމެނޭ ފުރަތަމަ ފަހަރު ކަމަށާއި ދިވެހިބަހުން ދަރިވަރުންގެ ލިޔުމުގެ ހުނަރު ވަޒަންކުރެވޭ ފުރަތަމަ ފަހަރު ކަމަށް ވެސް މިނިސްޓްރީން ބުންޏެވެ.

މިނިސްޓްރީން ބުނީ ގިނަ ސްކޫލުތަކުގައި ގްރޭޑް 9 ގެ ހުރިހާ ދަރިވަރުން މި އިމްތިހާނުގައި ބައިވެރިވާއިރު، ދަރިވަރުން ގިނަ ސްކޫލުތަކުގައި ހޮވާލެވޭ ވަކި ދަރިވަރުންތަކެއް ބައިވެރިވާ ކަމަށެވެ.

ނާލޯގެ ދާއިރާ ފުޅާކުރުމުން ތައުލީމީ ނިޒާމާ ބެހޭ އަގުހުރި މައުލޫމާތު ލިބި، މުޅި ރާއްޖޭގައި ކިޔަވައިދިނުމާއި އުނގެނުމުގެ ފެންވަރު ރަނގަޅުކުރުމަށް ކުރެވޭ މަސައްކަތްތަކަށް އިތުރު އެހީތެރިކަމެއް ލިބޭނެ ކަމަށް މިނިސްޓްރީން ބުންޏެވެ.