މާލޭގައި އިމާރާތަކުން ވެއްޓި މަރުވި ޒުވާން އަންހެންކުއްޖާ ހައްވާ ޔުމްނާ ރަޝީދުގެ މައްސަލައިގައި އިންސާފު ހޯދައިދިނުމަށް ޒުވާނުން ކުރަމުންދާ މުޒާހަރާ ސިޔާސީ ކޮށްފިއެވެ.

ޒުވާނުން ނުކުމެ ކުރި މުޒާހަރާގެ މައިގަނޑު މަޤްޞަދަކީ ޔުމްނުގެ މައްސަލައިގައި އިންސާފު ހޯދައިދިނުމެވެ. ނަމަވެސް، މުޒާހަރާގެ ތެރެއަށް ސިޔާސީ ފަރާތްތައް ވަދެ، މުޒާހަރާގެ މަޤްޞަދު މިހާރު ވަނީ އޮޅުވާލާފައެވެ.

މަޢުލޫމާތު ލިބިފައިވާ ގޮތުގައި، އަންނަ ރިޔާސީ އިންތިޚާބަށް ފައްކާކުރަމުންދާ އެމް.އެން.ޕީން ވެސް ވަނީ އެ ޕާޓީގެ ނައިބު ރައީސް ސިދާތާއާއި އިތުރު ބަޔަކު މި މުޒާހަރާގެ ތެރެއަށް ވައްދާފައެވެ. އަނެއްކޮޅުން، ދަނޑިވަޅުގެ ބޭނުން ހިފައި އެމްޑީޕީގެ އިސް އެކްޓިވިސްޓުން މުޒާހަރާގައި ބައިވެރިވެ، މުޒާހަރާގެ މަޤްޞަދު ބަދަލުކުރުމަށް މަސައްކަތްކޮށްފައިވެއެވެ. އަދި އެމްޑީޕީން މުޒާހަރާގައި ބައިވެރިވުމަށް އެ ޕާޓީގެ އެކްޓިވިސްޓުންނަށް ގުޅައި، ޕޮކެޓްމަނީ ދިނުމުގެ އިތުރުން ޕޯސްޓަރުތައް ތައްޔާރުކޮށް، އެތަކެތި ބަހާފައި ވެއެވެ.

މީގެ އިތުރުން، އެމްޑީޕީގެ ޖަގަހައިގައި މުޒާހަރާގެ މެޓީރިއަލް ތައްޔާރުކުރި ކަމުގެ ފޮޓޯތައް ވެސް އާންމުވެފައިވެއެވެ. މިކަމާ ގުޅިގެން ގިނަ ފަރާތްތަކުން ވަނީ ކަންބޮޑުވުން ފާޅުކޮށްފައެވެ.

ޒުވާނުން މުޒާހަރާ ކުރަމުންދަނީ ސަރުކާރާ ދެކޮޅަށް ނޫންކަމާއި، ވެރިން އިސްތިޢުފާ ދިނުމަށް ގޮވާލުމެއް ނޫންކަން ފާހަގަކުރެވެއެވެ. ނަމަވެސް، ސިޔާސީ ފަރާތްތަކުން މުޒާހަރާގެ ތެރެއަށް ވަދެ، މުޒާހަރާގެ މަޤްޞަދު އޮޅުވާލައި، އެކަމުގެ ސިޔާސީ ފައިދާ ނެގުމަށް މަސައްކަތްކުރަމުންދާކަން ފާހަގަކުރެވެއެވެ.

މުޒާހަރާގައި ބައިވެރިވި ޒުވާނުން ވަނީ ޔުމްނާގެ މައްސަލައިގައި އިންސާފު ހޯދައިދިނުމަށާއި، މުޖުތަމަޢުގައި އިތުރުވަމުންދާ މިފަދަ ހާދިސާތައް ހުއްޓުވުމަށް އިސްލާމީ ޝަރީޢަތް ތަންފީޒުކުރުމަކީ އެންމެ އެކަށީގެންވާ ހައްލު ކަމުގައި ފާހަގަކޮށްފައެވެ. ނަމަވެސް، ސިޔާސީ ފަރާތްތަކުގެ ނުފޫޒުގެ ސަބަބުން މުޒާހަރާގެ އަޞްލު މަޤްޞަދު އޮޅިގެންދާކަން ފާހަގަކުރެވެއެވެ. އެ ސިޔާސީ މީހުންނަކީ އިސްލާމީ ޝަރީޢާ އާއި ދެކޮޅު ބައެއް ކަމަށް އެ މުޒާހަރާގައި ބައިވެރިވި ޒުވާނުން ބުނެއެވެ.