މާލޭގައި އިމާރާތަކުން ވެއްޓުނު ޒުވާނާއަށް އިންސާފު ހޯދައިދިނުމަށް ޒުވާނުން ކުރަމުންދާ މުޒާހަރާގައި އިސްލާމީ ޝަރީޢަތް ގާއިމުކުރުމަށް ގޮވާލައިފިއެވެ. މިރޭ އޮތް މުޒާހަރާގައި ބައިވެރިވި ޒުވާނުން ވަނީ "ހައްލަކީ އިސްލާމީ ޝަރީޢަތް" ކަމަށް ބުނާ ބޯޑުތަކެއް ހިފައިގެން އެމީހުންގެ އަޑު އިއްވާފައެވެ.
ރާއްޖޭގައި މިހާރު އޮންނަނީ އިސްލާމް ދީނުގައި ޙަރާމް ކަންތައްތައް ވެސް ހުއްދަކޮށްފައިވާ ޤާނޫނު އަސާސީއެއްގެ މައްޗަށް ބިނާކޮށް، އެ ޤާނޫނު އަސާސީއާއި ހަވާލާދީ ޙުކުމް އިއްވާ ސިސްޓަމެކެވެ. މިސާލަކަށް މަސްތުވާތަކެތި (ރާ) ހުއްދަ ކޮށްފައިވާ ޤާނޫނެކެވެ. އެގޮތުން ބައެއް ތަންތަނުގައި ރާ ވިއްކައި އެއިން މަންފާ ހޯދުން ހުއްދައެވެ. ހަމަ އެހެންމެ ރިބާގެ މުޢާމަލާތް ވެސް ހުއްދައެވެ. އަންހެނުން ޢައުރަ ނިވާނުކޮށް އުޅުނަސް ހުއްދައެވެ.
މިރޭ އޮތް މުޒާހަރާގައި ޤައުމުގެ ޒުވާނުން ގޮވާލާފައި ވަނީ، ވެއްޓިފައިވާ އަނދަވަޅުން މި ޤައުމަށް އަރައިގަނެވޭނޭ ހަމައެކަނި ގޮތަކީ އިސްލާމީ ޝަރީޢާ ޤާއިމްކުރުމެވެ.
Advertisement
މި މުޒާހަރާގެ މައިގަނޑު މަގުސަދަކީ ހ. ފެންޓޯނިއޯ އިމާރާތުން ވެއްޓުނު 21 އަހަރުގެ ހައްވާ ޔުމްނާ ރަޝީދުގެ މައްސަލައިގައި އިންސާފު ހޯދައިދިނުމެވެ. މުޒާހަރާގައި ބައިވެރިވި ގިނަ އަދަދެއްގެ ޒުވާނުން ވަނީ މި މައްސަލައިގައި ފުލުހުން އިންސާފުވެރި ތަޙުޤީޤެއް ނުހިންގާކަމަށް ބުނެ ކަންބޮޑުވުން ފާޅުކޮށްފައެވެ. އޭގެތެރޭގައި ކުޑަކަމުދާ ތަކެތި ދިނުމަށް އިންކާރުކުރި މީހުންނަށް ފިޔަވަޅެއް އަޅާފައި ނުވާކަން ފާހަގަކުރިއެވެ. މިކަމާއި ގުޅިގެން ޕްރޮސެކިއުޓަރ ޖެނެރަލްގެ އޮފީހުން ޕޮލިހަށް އެންގީ، އެ ޒުވާން އަންހެން މީހާއާއެކު އެރޭ އުޅުނު މީހުންގެ ތެރެއިން ކުޑަކަމުދާތަކެތި ދިނުމަށް އިންކާރުކުރި މީހުންގެ މައްސަލަ ތަޙުޤީޤު ކުރަން ޖެހޭ ކަމަށެވެ.
އިސްލާމީ ޝަރީއަތް ޤާއިމްކުރުމަށް މުޒާހަރާގައި ގޮވާލިއިރު ބައެއް ޒުވާނުންގެ ކިބައިން މުޖުތަމަޢު އަދި އިސްލާމްދީން ވެސް ޤަބޫލުނުކުރާ މަންޒަރުތަކާއި އަޑުތައް ވަނީ އިވިފައެވެ. މިފަދަ ކަންކަމާއި ގުޅިގެން އާންމުން ވަނީ ހިންހަމަނުޖެހުން ފާޅުކޮށްފައެވެ. މުޒާހަރާ ތެރޭގައި ބޭއަދަބީ ބަސް ބޭނުން ކުރުމަކީ ދަށުދަރަޖައިގެ ކަމެއްކަން ފާހަގަކޮށް ބައެއް ބެލެނެވެރިން ބުނެފައިވަނީ އެއީ ޅަ އުމުރުފުރައިގެ ކުދިންނަށް ދެވޭ ވަރަށް ނުބައި މެސެޖެއް ކަމަށެވެ. އަދި ހާއްސަކޮށް ރާއްޖެ ފަދަ އިސްލާމީ ޤައުމެއްގައި ނިވާކަން ކުޑަ ހެދުން ލައިގެން އިންސާފު ހޯދުމަށް ނުކުމެ އުޅުމަކީ ބަލައިގަނެވޭނެ ކަމެއް ނޫން ކަމަށް ބުނެ އާންމުން ވަނީ ނުރުހުން ފާޅުކޮށްފައެވެ.
ފުރާޅުން ވެއްޓުނު ހާދިސާ އާއި ގުޅިގެން މުޒާހަރާގައި ބައިވެރިވި ޒުވާނުން ވަނީ މި މައްސަލައިގައި އިންސާފު ހޯދައިދިނުމަށާއި، މުޖުތަމަޢުގައި އިތުރުވަމުންދާ މިފަދަ ހާދިސާތައް ހުއްޓުވުމަށް އިސްލާމީ ޝަރީޢަތް ތަންފީޒުކުރުމަކީ އެންމެ އެކަށީގެންވާ ހައްލު ކަމުގައި ފާހަގަކޮށްފައެވެ.
