ސްޕެއިންގެ ވެރިރަށް މެޑްރިޑްގެ މަގުތަކަށް ބައިލައްކައަށްވުރެ ގިނަ މީހުން ނުކުމެ ސަރުކާރާ ދެކޮޅަށް ކުރި ވަރުގަދަ މުޒާހަރާ، ފުލުހުން ނުކުމެ ބާރުގެ ބޭނުންކޮށްގެން ރޫޅާލައިފިއެވެ. ސެއުޓާ ސަރަހައްދަށް ދިމާވެފައިވާ ހިޖުރަވެރިންގެ ބޮޑު ކާރިސާއާ ގުޅިގެން، ބޮޑުވަޒީރު ޕެޑްރޯ ސަންޗޭޒްގެ ސަރުކާރާއި ދެކޮޅަށް ނުރުހުން ފާޅުކުރުމަށް ޕްލާޒާ ޑި ސިބެލެސް ސަރަހައްދަށް އެއްވި މީހުން ހުއްޓުވުމަށް ފުލުހުން ވަނީ ރަބަރު ވަޒަނާއި ކަރުނަގޭސް ބޭނުންކޮށްފައެވެ.

އިދިކޮޅު ކޮންޒަވޭޓިވް ޕާޓީއިން އިންތިޒާމުކުރި މި މުޒާހަރާގެ ބައިވެރިން ގޮވާލަމުންދިޔައީ ސަންޗޭޒްގެ ސަރުކާރުން ގައުމުގެ ސަލާމަތާއި ބޯޑަރުތައް ރައްކާތެރިކުރުމުގައި ފެއިލްވެފައިވާ ކަމަށެވެ.

ސުލްހަވެރިކަމާއި އެކު ފެށި މުޒާހަރާގެ މަސްލަހަތު ގެއްލި، ބައެއް ބައިވެރިން ސްޕެއިންގެ ގާނޫނު ހަދާ މަޖިލިސް ކުރިމަތީގައި ތިބި ފުލުހުންނާއި ދިމާލަށް އެކި އެއްޗެހި އުކަން ފެށުމުން ހާލަތު ވަރަށް ބޮޑަށް ގޯސްވިއެވެ. މުޒާހަރާ ކޮންޓްރޯލުން ނެއްޓުމުން، ފުލުހުން ވަނީ އެއްވެފައި ތިބި މީހުންގެ ގަޔަށް އަމާޒުކޮށް ރަބަރު ވަޒަން ޖަހައި، ކަރުނަގޭސް އުކައިގެން މީހުންތައް އެ ސަރަހައްދުން ފަހާ ދުރުކޮށްފައެވެ.

މި ހަމަނުޖެހުންތަކާއި ގުޅިގެން މެޑްރިޑްގެ ފުލުހުން ވަނީ މުޒާހަރާގެ ތެރެއިން 4 މީހަކު ހައްޔަރުކޮށްފައެވެ. އޭގެ ތެރޭގައި 18 އަހަރުން ދަށުގެ ދެ ކުޑަކުދިންވެސް ހިމެނޭއިރު، އެމީހުންގެ މައްޗަށް ކުރަނީ އާންމު މަސްލަހަތު ނަގާލުމާއި ފުލުހުންނަށް ހަމަލާދިނުމުގެ ތުހުމަތެވެ. މީގެ އިތުރުން، މުޒާހަރާގެ ބައިވެރިންނާ ދެމެދު ހިނގި ކުރިމަތިލުންތަކުގައި 4 ފުލުހަކަށް އެކިވަރުގެ އަނިޔާތައް ލިބިފައިވާއިރު، އޭގެ ތެރެއިން އެއް ފުލުހަކަށް ލިބުނު އަނިޔާ ސީރިއަސް ކަމަށް ރިޕޯޓުތައް ބުނެއެވެ