ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ އާޖެންޓީނާގެ ލިއޮނެލް މެސީ، ސްޕެއިންގެ ދެވަނަ ޑިވިޜަންގެ ކްލަބެއް ކަމަށްވާ ސީޑީ އެލްޑެންސް ރަސްމީކޮށް ގަނެފިއެވެ. 1921 ވަނަ އަހަރު އުފެދުނު އަދި 100 އަހަރަށްވުރެ ދިގު ތާރީޚެއް އޮތް އެލްޑެންސްއިން ހާމަކުރި ގޮތުގައި، މެސީ އެ ކްލަބްގެ މެޖޯރިޓީ ހިއްސާ ގަތުމަކީ އެ ކްލަބްގެ ތާރީޚުގައި ހުޅުވިގެންދިޔަ މުޅިން އައު ސަފްހާއެކެވެ.
މިއީ މިއަހަރުގެ ތެރޭގައި ސްޕެއިންގެ ކްލަބެއް މެސީ ގަތް ދެވަނަ ފަހަރެވެ. މީގެކުރިން މިދިޔަ އެޕްރީލް މަހު އޭނާ ވަނީ ސްޕެއިންގެ ޔޫއީ ކޯނެޔާ ވެސް ގަނެފައެވެ.
މިވަގުތު އެމެރިކާގެ އިންޓަރ މައާމީއަށް ކުޅެމުންދާ އަދި ދާދިފަހުން ޤައުމީ ޓީމަށް ކުޅުން ހުއްޓާލާކަން އިޢުލާންކުރި މެސީގެ މި ނިންމުމާއެކު، ފުޓްބޯޅަ ދުނިޔޭގެ އެންމެ ބޮޑު ވާދަވެރިކަން މިވަނީ ސްޕެއިންގެ ދެވަނަ ޑިވިޜަނަށް ބަދަލުވެފައެވެ. ސަބަބަކީ މެސީގެ ވާދަވެރި ކްރިސްޓިއާނޯ ރޮނާލްޑޯވެސް ވަނީ ދާދިފަހުން ސްޕެއިންގެ ދެވަނަ ޑިވިޜަންގެ ކްލަބެއް ކަމަށްވާ ޔޫޑީ އަލްމީރިއާ ގެ 25 އިންސައްތަ ހިއްސާ ގަނެފައެވެ. އެހެންކަމުން، ކުރިން ރެއާލް މެޑްރިޑާއި ބާސެލޯނާގެ ޕިޗުމަތިން ފެނުނު ވާދަވެރިކަން، މިހާރު ކްލަބްތަކުގެ ވެރިންގެ ގޮތުގައި ހިންގުމުގެ ދާއިރާއިން ފެނިގެންދާނެއެވެ.
Advertisement
22 ޓީމު ވާދަކުރާ ސްޕެއިންގެ ދެވަނަ ޑިވިޜަންގައި ސީޑީ އެލްޑެންސް މިވަގުތު އޮތީ ތާވަލުގެ 19 ވަނައިގައެވެ. އެޓީމު މިސީޒަންގައި މިހާތަނަށް ކުޅުނު 7 މެޗުގެ ތެރެއިން މޮޅުވެފައިވަނީ އެންމެ މެޗަކުން ކަމަށްވިޔަސް، ކްލަބުން ބުނާގޮތުގައި މެސީ ފަދަ ބޮޑު ޝަޚްޞިއްޔަތެއް ކްލަބާ ހަވާލުވުމަކީ ދިގު މުއްދަތުގެ ބޮޑު ޕްރޮޖެކްޓެއްގެ ފެށުމެވެ. ކުރިން ކޮލަމްބިއާގެ އިންވެސްޓްމަންޓް ގްރޫޕެއްގެ އަތުގައި އޮތް މި ކްލަބްގެ ހިއްސާތައް ބަދަލުކުރުމުގެ މަރުހަލާ ނިމިފައިވާއިރު، މި މުއާމަލާތް މުޅިން ފުރިހަމަވާނީ ސްޕެއިންގެ ހަޔަރ ސްޕޯޓްސް ކައުންސިލް ގެ ރަސްމީ ހުއްދަ ލިބުމުންނެވެ.
