ގައުމު ދެކެ ލޯބިނުވާ ބައެއްގެ އޮއިވަރުގައި ނުޖެހުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ފުލުހުންގެ 92 ވަނަ އަހަރީ ދުވަހުގެ ޖަލްސާގައި ރައްޔިތުންނަށް ގޮވާލައްވައިފިއެވެ.

ރައީސް ވިދާޅުވީ "ބިރަކާ ނުލައި މަޖާކުރުން" ޕްރޮމޯޓްކުރި ފަރާތްތަކުގެ ޚިޔާލުތަކަށް ރައްޔިތުން ތާއީދު ނުކުރުމަށެވެ. އަދިއެފަދަ ޚިޔާލުތައް ފެތުރުމަކީ ޒުވާނުން އިސްލާމްދީނުގެ އުސޫލުތަކާއި ދިވެހިންގެ ރީތި އާދަކާދަތަކުން ދުރުކުރުމަށް ކުރެވުނު މަސައްކަތެއް ކަމަށެވެ.

ރައީސް ވިދާޅުވީ މިފަދަ ކަންކަމުގެ ސަބަބުން ވިކްޓިމައިޒްވެފައިވާ ޒުވާނުންގެ ބޭނުންކޮށްގެން ސިޔާސީ ފައިދާ ނެގުމަށް މަސައްކަތްކުރާ ފަރާތްތަކުގެ ނުފޫޒުގައި ރައްޔިތުން ޖެހިގެން ނުވާނެ ކަމަށެވެ. އަދި ކާކުކަން ނޭނގޭ މީހުން ފަތުރާ ދޮގު ވާހަކަތަކުގައި ޖެހި، އެ ދޮގުތަކުގެ އަޅުންގެ ގޮތުގައި ވެގެން ނުވާނެކަމަށް އެމަނިކުފާނު އިންޒާރުދެއްވިއެވެ.

ރައީސް މުޢިއްޒު ގޮވާލެއްވީ ރައްޔިތުން އަމިއްލަ ސިކުނޑިން ވިސްނުމަށާއި، ބުއްދީގެ ބޭނުން ހެޔޮގޮތުގައި ހިފުމަށެވެ. އެމަނިކުފާނު ވިދާޅުވީ މިއީ ހަމައެކަނި އޮތް އޮޕްޝަނެއް ނުވަތަ ޗޮއިސްއެއް ނޫންކަމަށާއި، މިއީ ކޮންމެ ރައްޔިތެއްގެވެސް ޒިންމާއެއް އަދި ވާޖިބެއްކަމަށެވެ.