ދިވެހިންނަށް ގޮލްފް ކުޅިވަރު ތަޢާރަފުކޮށް، ރާއްޖޭގެ ފުރަތަމަ މުބާރާތް "މޯލްޑިވްސް އޯޕަން 2025" ސްރީލަންކާގެ ކެންޑީގައި ފަށައިފިއެވެ. މި މުބާރާތް ފައްޓަވައިދެއްވީ ކުޅިވަރާއި ހަށިހެޔޮކަމާބެހޭ ވަޒީރު އަބްދުﷲ ރާފިޢުއެވެ.
މީގެ ކުރިން ދިވެހިންގެ މެދުގައި ގޮލްފް މުބާރާތެއް ބާއްވާފައެއް ނުވެއެވެ. މުޅިން އަލަށް މޯލްޑިވްސް އޯޕަންގެ ނަމުގައި މި ގޮލްފް މުބާރާތް އިފްތިތާހުކޮށްފައި މިވަނީ ގިނަ އަދަދެއްގެ ދިވެހިން ދިރިއުޅޭ ސްރީލަންކާގައެވެ.
މިއަދު މި މުބާރާތް އިފްތިތާހު ކުރުމަށް ބޭއްވި ހާއްސަ ރަސްމިއްޔާތުގައި މޯލްޑިވްސް ގޮލްފް އެސޯސިއޭޝަން (އެމްޖީއޭ) އިސްވެރިން ބައިވެރިވިއެވެ. މި ރަސްމިއްޔާތުގައި ވާހަކަދައްކަވަމުން ގޮލްފް އެސޯސިއޭޝަންގެ ރައީސް ހުސެއިން އަފީފް (ޗަމްޕާ އަފީފް) ވަނީ އައު ކުޅިވަރެއް ރާއްޖޭގައި ތަރައްޤީކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާ އެއްބާރުލެއްވުން ފާހަގަކުރައްވާ ސަރުކާރަށް ޝުކުރު އަދާކުރައްވާފައެވެ.
Advertisement
އަފީފް ވިދާޅުވީ ގޮލްފް މުބާރާތް ފައްޓަވާދެއްވުމަށް ކުޅިވަރު ވަޒީރު ރާފިއު ސްރީލަންކާއަށް ވަޑައިގެންދެއްވުމަކީ ގޮލްފް ކުރިއެރުވުމަށް ލިބިގެންދާ ހިތްވަރެއް ކަމަށެވެ.
ދިވެހިންނަށް ގޮލްފް ތައާރަފުވެގެން ދިއުމާއެކު ގިނަ ކުޅުންތެރިންތަކެއް ތަމްރީނުކުރުމާއި، ގޮލްފް ކުޅުމަށް ބޭނުންވާ ވަސީލަތްތައް ތަރައްޤީކުރުމަށް މަގުފަހިވެގެންދާނެ ކަމަށް ގޮލްފް އެސޯސިއޭޝަނުން ބުނެއެވެ.
