ތިޔަބައިމީހުން މާތް اللهގެ ރަޙްމަތަށް އެދޭ ކަމުގައި ވާނަމަ މި ޤައުމު ހަލާކުނުކޮށް އެންމެން އެއްބައިވަންވަންތަވެ އެކަތިގަނޑަކަށް ވުމަށް، މިއަދުގެ ހުކުރު ޚުޠުބާގައި ވަރަށް ވަރުގަދަ އިންޒާރެއް ދިވެހި މުސްލިމު އަޚުންނާއި އުޚްތުންނަށް ދެއްވައިފިއެވެ.
މިއަދުގެ ހުކުރު ޚުޠުބާގައި ވަނީ، އަޅުގަނޑުމެން މުސްލިމުންގެ ތެރޭގައި ބައިބައިވުން އުފައްދަން ބަޔަކު މަސައްކަތް ކުރަމުންދާކަން ހަނދާންކޮށްދެއްވާފައެވެ. އެގޮތުން، ދުނިޔޭގެ އެންމެހާ މުސްލިމުންގެ މެދުގައި ބައިބައިވުމާއި ނަފްރަތާއި ދެކޮޅުވެރިކަން އުފައްދަމުންދާ ކަމަށާއި، މުއުމިނުންނަށް ގެއްލުން ދިނުމަށް ކުރަމުންދާ ކަންތަކަށް އަޅުގަނޑުމެން ދިވެހިން ވަރަށް ސަމާލުވެ ހޭލައި ތިބެންޖެހޭކަން ހަނދާންކޮށްދެއްވައި، މުއުމިނުންނަށް ގެއްލުން ނުދިނުމަށް އިންޒާރު ދެއްވިއެވެ. ޚުޠުބާގައި ކޮރަޕްޝަނާއި ޚިޔާނާތާއި އަނިޔާވެރިކަމުގެ ތެރެއިން އަމިއްލަ ޤައުމުތައް ހަލާކުކޮށްލާ މީހުންގެ ނުރައްކާތެރި ނަތީޖާތަކަށް އަލިއަޅުވާލެއްވިއެވެ.
“އެންމެ ނުބައި މީހަކީ އޭނާގެ ޤައުމު ހަލާކުކޮށް، ސުލްހައާއި އަމާންކަން ނައްތާލައި، އަމިއްލަ ރައްޔިތުންނާ ހަނގުރާމަކުރާ މީހާ،” އިމާމްގެ ޚުޠުބާގައި ފާހަގަކުރެއްވިއެވެ. ހުރިހާ މުސްލިމުން ވެސް އަރަހުށި ހުސްޠާހިރުވަންތަ މާތް الله އަށް ބިރުވެތިވެ، އެކަލާނގެ އަމުރުފުޅާއި އެއްގޮތަށް ޢަމަލުތައ ބެހެއްޓުމުގެ ގޮތުން ތައްޔިތުން އެއްބައިވަންތަވެ، ދޭދޭމީހުން ވެސް ދެބަސްވުމާއި އެކަކު އަނެކަކަށް ބަދުބަސް ބުނުމުން ދުރުހެލިވުމަށް ގޮވާލެއްވިއެވެ. ޤުރުއާނާއި ޙަދީޘް ތަކަށް އަލިއަޅުވާލައްވަމުން، ބައިބައިވުމުގެ ބޮޑު ފާފައާއި، އޯގާތެރިކަމާއި، އެއްބައިވަންތަކަމާއި، ޢަދުލުވެރިކަމުގެ މާތްކަން ހަނދާންކޮށްދެއްވިއެވެ.
މިއަސުގެ ޚުޠުބާގައި، އެއްބައިވަންތަކަމާއެކު އުޅުމާއި، ފަގީރުންނަށް އެހީތެރިވުމާއި، އެކަކު އަނެކަކާއި ރަޙްމަތްތެރިކަމުގެ ގުޅުން އުފެއްދުމާއި، މަގުފުރެދިފައިވާ މީހުންނަށް މަގުދައްކައިދިނުމުގެ މުހިންމުކަމަށް އަލިއަޅުވާލައްވާފައެވެ. ރަސޫލާ ޞައްލަﷲ ޢަލައިހި ވަސައްލަމަ ޙަދީޘް ކުރެއްވި ފަދައިން އެހެން މީހުންނަށް ގެއްލުމާއި އަނިޔާވެރިކަން ގެނެސްދޭ މީހުންނަށް މަތިވެރި މާތް الله ގެ ކޯފާ އާއި ކުރިމަތިލާން ޖެހޭނެ ކަމުގެ އިންޒާރު ދެއްވިއެވެ.
މުޖުތަމަޢުގެތެރޭގައި ދޮގު ޚަބަރު ފަތުރާ މީހުންނާއި، މުސްލިމުންނަށް ފުރައްސާރަ ކުރާ މީހުންނާއި، ނުހައްގުން އަނެކާއަކީ ކާފަރެކޭ ބުނާ މީހުންނާއި، އަދި އެހެން މީހުންގެ ކުށްތައް ފަޅާއަރުވާ މީހުންގެ ނުބައިކަމާއެވެ. އެފަދަ މީހުންނާއި ސީދާ މުޚާޠަބު ކުރައްވައި ވިދާޅުވިއެވެ.
“ފަހެ ތިޔަބައިމީހުން މުސްލިމުންނަށް އުނދަގޫކޮށް، އެ މީހުންގެ މައްޗަށް ބާޠިލު ތުހުމަތުތައް ނުކުރާށެވެ! ދޮގު ބުހުތާން ވާހަކަތައް ނުފަތުރާށެވެ! ދެރަކޮށް، ނިކަމެތިނުކޮށްލާށެވެ! ބަދުބަސް ބުނެ، ލަޢުނަތްދީ، ކާފިރުކޮށް، އެ މީހުންނީ ބިދުޢަވެރީންނާއި ފާސިޤުން ކަމުގައި ބުނެ ނޫޅޭށެވެ! އެ މީހުންގެ އަތްދަށުން ދޫވެގެން ކުރެވޭ ކުށްތައް ފަތުރައި، ފަޟީޙަތް ނުކުރާށެވެ! އެ މީހުންގެ މުދާ ވަގަށް ނަގައި، ކެހިދީ، އަބުރު ނަގައިލައި، އެ މީހުންގެ ފުރާނަޔަށާއި އަބުރަށް އަރައިނުގަންނާށެވެ! ކީރިތި ރަސޫލާ މިންބަރަށް އަރައިވަޑައިގަންނަވައި ހަރުއަޑުފުޅުން ޙަދީޘްކުރެއްވި ބަސްފުޅެއްގެ މާނައިގައި ވެއެވެ. "އޭ އެބައެއްގެ ދުލުން އީމާންވެ، އެ އީމާންކަން ހިތާހަމައަށް ނުފޯރާ މީހުންނޭވެ! ތިޔަބައިމީހުން މުސްލިމުންނަށް އުނދަގޫ ނުކުރާށެވެ! އެ މީހުންނަށް ޢައިބުނުކިޔާށެވެ! އެ މީހުންގެ ކުށްތައް ހޯދައި ހާމަނުކުރާށެވެ. އެހެނީ ތިމާގެ މުސްލިމް އަޚާގެ ކުށްތައް ހޯދައި އުޅޭ މީހުންގެ ކުށްތައް މާތް ﷲ ހާމަކުރައްވާހުއްޓެވެ. އަދި އެފަދަ މީހާ ގޭގެ އެތެރޭގައި ވިޔަސް މާތް ﷲ އޭނާ ފަޟީޙަތްކުރައްވާހުށްޓެވެ."
ޚުޠުބާ ނިންމަވައިލައްވަމުން، އަޅުގަނޑުމެންނަށް ގޮވައިލެއްވީ މަރުގެ ހަޤީޤަތާއި ނަރަކައިގެ އަލިފާންގަނޑުގެ މަތިން ހަނދާން ހަނދާން ނައްތާނުލުމަށެވެ. އަދި މުސްލިމުންނަށް އިލްތިމާސް ކުރެއްވީ އަޅުގަނޑުމެންގެ ފާފަތައް ގިނަވެ އުޑައި ޖެހެންދެން ހުރި ކަމުގައި ވިޔަސް، އަޅުގަނޑުމެންގެ ވެރިރަސްކަލާނގެ އަކީ ފާފަތައް ފުއްސެވުމުގައި އޯގާތެރި އަދި ދީލަތިވަންތަ ރަސްކަލާނގެކަން ހަނދުމަކޮށް އަވަހަށް ތައުބާވެ އަދި ތައުބާ މަތީގައި ދެމިހުރުމަށެވެ. އަދި، އަޅުގަނޑުމެން ދޫކޮށްލާ ކޮންމެ ނޭވާއަކީ މިދުނިޔެއާއި ވަކިވެ ހިސާބުބައްލަވާ ދުވަހާއި ކައިރިވަމުންދާ ކަމުގެ ނިޝާނެއްކަން ވެސް ޚުޠުބާގައި ހަނދާންކޮށްދެއްވިއެވެ.
