ރާއްޖެއަށް ދިމާވެފައިވާ ޑޮލަރު ލިބުމުގެ ދަތިކަން އެއްކޮށް ހައްލުވެ، 2027 ނިމުމުގެ ކުރިން ޑޮލަރު ރޭޓް 15.42ރ. އަށް ވެއްޓޭނެ ކަމުގެ އުންމީދު އެބައޮތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
"ދެނޯ" ގެ އެއް ވަނަ އެޕިސޯޑްގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، "އިރާދަކުރެއްވިއްޔާ ޑޮލަރުގެ މައްސަކަ އެއްކޮށް ހައްލުވާނެ ކަމަށާއި ނަމަވެސް ވަރަށް ފިޔަވަޅުތަކެއް އަޅަން ޖެހޭނެ ކަމަށެވެ. އަދި މަސައްކަތް ކުރަނީ 2027 ގެ ނިޔަލަށް ޑޮލަރު ރޭޓު، އޭގެ އަސްލު ރޭޓް (ބެންކު ރޭޓުގައި) ލިބެން ހުންނާނެ ގޮތަށް ހެދުމަށެވެ.
ޑޮލަރުގެ މައްސަލަ ހައްލު ކުރުމަށް ރައީސް ޑރ. މުއިއްޒުގެ ސަރުކާރުން އެޅި އެންމެ މުހިންމު ފިޔަވަޅަކީ ފަތުރުވެރިކަމުގެ ސިނާއަތުން ލިބޭ ޑޮލަރުގެ ވަކި އިންސައްތައެއް ރާއްޖޭގެ ބޭންކުތަކަށް މާރުކުރަން މަޖުބޫރުވާ ގޮތަށް ހެދުމެވެ. މިގޮތުން ބޭރު ފައިސާއާ ބެހޭ ގާނޫނުގެ ދަށުން ޑޮލަރު މާރުކުރުމުގައި ރިސޯޓުތަކާއި ގެސްޓްހައުސްތަކަށް ވަކި އުސޫލުތަކެއް ކަނޑައަޅާފައިވެއެވެ.
Advertisement
އެމަނިކުފާނު އިތުރަށް ވިދާޅުވީ ޑޮލަރުގެ ރޭޓު ހައްލުކުރުމަށް ސަރުކާރު މިހާރު މިތިބީ ރަނގަޅު ޓްރެކެއްގައި ކަމަށާއި، ޑޮލަރު މާރު ކުރަންވެސް އެންމެންވެސް އެއްބާރުލުން ދޭތީ ވަރަށް ބޮޑަށް އުފާކޮށް ޝުކުރު އަދާކުރާ ކަމަށެވެ. އެމަނިކުފާނުގެ ޝުކުރުގެ ލިސްޓުގައި ހާއްސަކޮށް ޓޫރިޒަމް އިންޑަސްޓްރީގެ ވެރިން ހާއްސަކުރިއެވެ.
ޑޮލަރު މާރު ކުރުމުގެ ގާނޫނަށް އަމަލު ކުރަން ފެށި ފަހުން މިދިޔަ މަހުގެ ނިޔަލަށް 150 މިލިއަން ޑޮލަރު ވަނީ ރިސޯޓުތަކުން މާރުކޮށްފައެވެ. މިހާރު އަޅަމުންދާ ފިޔަވަޅުތައް ކަނޑައެޅިފައިވާ ތާވަލާ އެއްގޮތަށް އަޅަމުން ގެންދާ ނަމަ، ޑޮލަރުގެ މައްސަލަ ހައްލުވާނެ ކަމުގެ ފުރިހަމަ ޔަގީންކަން ރައީސް ވަނީ ދެއްވާފައިވެއެވެ.
