މަސްޖިދުއްނަބަވީގެ އިމާމު ފަޟީލަތުއްޝައިޚް ޑރ. ޞަލާޙުލް ބުދައިރު ރާއްޖެއަށް ކުރައްވަމުންގެންދަވާ ދަތުރުފުޅުން ރަމްޒުކޮށްދެނީ ރާއްޖެއާއި ސަޢުދީ ޢަރަބިއްޔާއާ ދެމެދު އޮތް އަޚުވަންތަކަމުގެ ގުޅުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް މުޢިއްޒު މިފަދައިން ވިދާޅުވީ، މަސްޖިދުއްނަބަވީގެ އިމާމު ޝައިޚް ޑރ. ޞަލާޙުލް ބުދައިރު ރައީސް އޮފީހަށް ކުރެއްވި އިޙްތިރާމުގެ ޒިޔާރަތުގައި ދެއްކެވި ވާހަކަފުޅުގައެވެ. މި ބައްދަލުވުމުގައި ރައީސް މުޢިއްޒު ވިދާޅުވީ، މަސްޖިދުއްނަބަވީގެ އިމާމެއް ރާއްޖެއަށް ވަޑައިގަތުމަކީ ދިވެހިރާއްޖެއަށް ލިބުނު ވަރަށް ބޮޑު ޝަރަފެއް ކަމަށެވެ.
Advertisement
ރައީސްގެ ވާހަކަފުޅުގައި، މީގެ 41 އަހަރު ކުރިން ފަހުން މަސްޖިދުއްނަބަވީގެ އިމާމަކު ރާއްޖެއަށް ވަޑައިގެންފައިވާކަން ފާހަގަކުރެއްވިއެވެ. އަދި ސަޢުދީ ޢަރަބިއްޔާއިން ރާއްޖެއަށް ދެއްވަމުން ގެންދަވާ އެހީީތެރިކަމާއި އެއްބާރުލެއްވުން ޝުކުރުވެރިކަމާއެކު ފާހަގަކުރެއްވިއެވެ. ޚާއްޞަކޮށް ޤައުމީ ތަރައްޤީގެ މަޝްރޫޢުތަކަށާއި އިސްލާމީ ތަޢުލީމު ފުޅާކުރުމަށް ދެއްވާ އެހީތެރިކަން އެމަނިކުފާނު ފާހަގަކުރެއްވިއެވެ.
މީގެއިތުރުން، ދިވެހި ޙައްޖުވެރިންނާއި ޢުމްރާވެރިންނަށް ސަޢުދީ ސަރުކާރުން ދެއްވާ އަޅާލުމާއި އޯގާތެރިކަމަށްޓަކައި ރައީސް މުޢިއްޒު ޝުކުރު އަދާކުރެއްވިއެވެ.
މި ބައްދަލުވުމުގައި ޝައިޚް ޑރ. ޞަލާޙުލް ބުދައިރު ވިދާޅުވީ، ދެ ޤައުމުގެ ގުޅުމަކީ އިސްލާމްދީނުގެ ޢަޤީދާއާ ގުޅިފައިވާ ކަމެއްކަމަށެވެ. އަދި ކުރިމަގުގައި މި ގުޅުން އިތުރަށް ހަރުދަނާވެގެންދާނެ ކަމަށް އުންމީދުކުރައްވާ ކަމަށް ވިދާޅުވިއެވެ. އޭގެއިތުރުން، ސަޢުދީ ރަސްގެފާނު ސަލްމާން ބިން ޢަބްދުލްޢަޒީޒް އަލްސަޢުދާއި، ވަލީއަޙުދު އަދި ބޮޑުވަޒީރު މުޙައްމަދު ބިން ސަލްމާންގެ ހެޔޮއެދުންތައް ރައީސް މުޢިއްޒަށް ޝައިޚް ރައްދުކުރެއްވިއެވެ.
ބައްދަލުވުން ނިމުމުގެ ކުރިން، ދެ ބޭފުޅުންވެސް ފާހަގަކުރެއްވީ މި ދަތުރުފުޅާއެކު ދެ ޤައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިވެގެންދާނެކަމަށް އުންމީދުކުރައްވާ ކަމަށެވެ.
