ދިވެހި އަސްކަރިއްޔާ ވަރުގަދަކުރުމަށް އޮތް ތަސައްވުރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭ ހާމަކުރައްވައިފިއެވެ. ސިފައިންގެ 133 ވަނަ އަހަރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އާމީ، ނޭވީ އަދި އެއަރފޯސްގެ މައްޗަށް އެކުލެވޭ ޔުނިފައިޑް އާމްޑް ފޯސްއަކަށް ދިވެހި އަސްކަރިއްޔާ ތަރައްޤީކުރެއްވުމަކީ ސަރުކާރުގެ ތަސައްވުރު ކަމަށެވެ.
ރައީސް މުޢިއްޒު ފާހަގަކުރެއްވި ގޮތުގައި، ވެރިކަމާ ހަވާލުވެވަޑައިގަތް އިރު ޤައުމުގެ އިޤްތިޞާދު އޮތީ ފުން އަނދަވަޅެއްގައެވެ. އެހެންކަމުން، އިޤްތިޞާދީ ކޮޅަށްޖެހުމުގެ މަސައްކަތާއެކު އަސްކަރިއްޔާ ތަރައްޤީކޮށް، ޤާބިލްކަން އިތުރުކުރުމުގެ މަސައްކަތްވެސް ފައްޓަވާފައިވާ ކަމަށް ވިދާޅުވިއެވެ.
ރައީސް ވިދާޅުވީ، ރާއްޖެއަކީ ހިކިފަސްތަން މަދު، އަދި ކަނޑުގެ ސަރަހައްދު ބޮޑު ޤައުމަކަށްވުމަކީ މިނިވަންކަމާމެދު ފަރުވާކުޑަކުރުމަށް އޮންނަ އުޒުރެއް ނޫން ކަމަށެވެ. ޤައުމުގެ އިޤްތިޞާދު މިނިވަންކަމާއެކު ހިމާޔަތްކޮށް ވަރުގަދަކުރެވޭނީ ސިފައިންނަށް އަސްކަރީ ބާރުވެރިކަން ގެނެސްދީގެން ކަމަށްވެސް ރައީސް ފާހަގަކުރެއްވިއެވެ.
ރައީސްގެ ވާހަކަފުޅުގައި، ސިފައިންގެއަށް ހުރިހާ ދާއިރާއަކުންވެސް ކުރިއެރުން ގެނެސްދެއްވާނެ ކަމަށާއި، ތަމްރީންކުރާ ސިފައިން އިތުރުކުރުމަށް ތަމްރީންދޭ މަރުކަޒުތައް ބޮޑުކޮށް، އެތަންތަނުގެ ކެޕޭސިޓީވެސް އިތުރުކުރައްވާނެ ކަމަށް ވިދާޅުވިއެވެ.
