ރާއްޖޭގައި ފުރަތަމަ ފަހަރަށް ވިޔަފާރި އުސޫލުން މޫދުވިނަ އާލާކުރުމުގެ މަޝްރޫޢުއެއް ބ. ފެހެންދޫގައި ރަސްމީކޮށް ފަށައިފިއެވެ.

މަސްވެރިކަމާއި ބެހޭ ވުޒާރާއިން މިއަދު މައުލޫމާތި ދިންގޮތުގައި، ފްލޯޓިންގް އޭކަރސް އިން ކުރިޔަށްގެންދާ މި މަޝްރޫޢު ރަސްމީކޮށް އިފްތިތާޙް ކޮށްދެއްވީ މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމެވެ.

އެ ވުޒާރާއިން ބުނެފައިވަނީ މި މަޝްރޫޢުގެ ސަބަބުން މެރިކަލްޗަރ ދާއިރާގައި އިތުރު މަޝްރޫޢުތައް ތަރައްޤީ ކުރުމަށް މަގުފަހިވެގެންދާނެ ކަމަށެވެ. މީގެ ނަތީޖާއެއްގެ ގޮތުން، ރަށުގައި ތިބެގެން ޒުވާނުންނާއި އަންހެނުންނަށް އައު ވަޒީފާގެ ފުރުސަތުތައް ހުޅުވި، ޤައުމުގެ އެކްސްޕޯޓް އާމްދަނީ އިތުރުވެ، ޒަމާނީ ޓެކްނޮލޮޖީ ރާއްޖެއަށް ތަޢާރަފުވެ، ދިވެހިންނަށް އާ ހުނަރުތައް ދަސްކުރުމުގެ ފުރުސަތު ލިބިގެންދާނެކަން ވަނީ ފާހަގަކޮށްފައެވެ

މި މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑުގެ ވަސީލަތްތައް ބޭނުންކޮށްގެން އިޤްތިޞާދީ މަސައްކަތް ފުޅާކުރުމަށް ކަނޑައަޅުއްވާފައިވާ ސިޔާސަތު ތަންފީޒުކުރުމުގެ ގޮތުންނެވެ. އަދި މެރިކަލްޗަރ ސިނާޢަތަކީ ދިވެހިންނަށް އިޤްތިޞާދީ ނަފާލިބޭ ސިނާޢަތަކަށް ހެދުމަށް ކުރެވޭ މަސައްކަތުގެ ތެރެއިން ކަމަށްވެސް ވުޒާރާއިން މައުލޫމާތު ދީފައިވެއެވެ.

ވަޒީރު އަހުމަދު ޝިޔާމް މީގެކުރިން ވިދާޅުވެފައިވަނީ މެރިކަލްޗަރ ސިނާޢަތް ވަކި ސިނާޢަތެއްގެ ގޮތުގައި ތަރައްޤީކޮށް ކުރިއެރުވޭނެ ކަމުގެ ޔަޤީންކަން އޮތް ކަމަށެވެ. މި މަޝްރޫޢަކީ ޤައުމުގެ އިޤްތިޞާދީ އަދި އިޖްތިމާޢީ ތަރައްޤީއަށް މަގުފަހިކޮށްދޭނެ މުހިންމު ފިޔަވަޅެއް ކަމަށް ވެސް ވުޒާރާއިން ވަނީ ފާހަގަކޮށްފައެވެ.