ރާއްޖޭގެ އެކި ސްކޫލްތަކުން 700 އަށް ވުރެ ގިނަ ޓީޗަރުންނާއެކު ސިލަބަސް އޮރިއެންޓޭޝަން ތަމްރީން ޕްރޮގްރާމް އިއްޔެ ފަށައިފި އެވެ.

އެޑިއުކޭޝަން މިނިސްޓްރީން ބުނީ ސްކޫލުތަކުގެ ގްރޭޑް 4 އަދި 5 ގެ ޓީޗަރުންނަށް އަމާޒުކޮށްގެން ސިލަބަސް އޮރިއެންޓޭޝަން ތަމްރީން ޕްރޮގްރާމެއް ފަށާފައިވާ ކަމަށެވެ. އެ ޕްރޮގްރާމް ކުރިއަށް ގެންދާނީ އިއްޔެ ފެށިގެން މި މަހުގެ 30 ވަނަ ދުވަހުގެ ނިޔަލަށް ކަމަށް މިނިސްޓްރީން ބުންޏެވެ.

މި ތަމްރީނު ޕްރޮގްރާމުގެ މައިގަނޑު މަގުސަދަކީ ޓީޗަރުންނަށް ފިލާވަޅުތައް އެކަށީގެންވާ ގޮތެއްގައި ކުރިއަށް ގެންދިއުމަށް ބޭނުންވާ އިތުރު އެހީތެރިކަން ފޯރުކޮށްދިނުން ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި, މި ޕްރޮގްރާމްގައި އިސްލާމް، ސައިންސް، ކްރިއޭޓިވް އާޓްސް، ސޯޝަލް ސްޓަޑީސް، މެތަމެޓިކްސް، ހެލްތް އެންޑް ފިޒިކަލް އެޑިއުކޭޝަން އަދި އިނގިރޭސި މާއްދާތަކުގެ ސިލަބަސްއާ ގުޅޭ މުހިންމު މައުލޫމާތުތައް ޓީޗަރުންނާ ހިއްސާކުރެވޭނެ އެވެ.

މި ތަމްރީނު ޕްރޮގްރާމް ކުރިއަށް ގެންދާނީ ދެދަންފަޅިއަކަށް ބަހާލައިގެން، އޮންލައިން ސެޝަންތަކެއްގެ ގޮތުގައި ކަމަށާއި މި ސެޝަންތަކުގައި 215 ސްކޫލަކުން 700 އަށް ވުރެ ގިނަ މުދައްރިސުން ބައިވެރިވާ ކަމަށް މިނިސްޓްރީން ބުންޏެވެ.

މިނިސްޓްރީން ބުނީ މި ޕްރޮގްރާމުގެ ސަބަބުން މުދައްރިސުންނަށް އައު ސިލަބަސްއާ ގުޅޭ މުހިންމު މައުލޫމާތު ލިބި، ކިޔަވައިދިނުމުގެ މަސައްކަތް އިތުރަށް ހަރުދަނާކޮށް، ފިލާވަޅުތައް ކުރިއަށް ގެންދިއުމަށް ބޭނުންވާ އެހީތެރިކަން ލިބޭނެ ކަމަށެވެ.