ދިވެހިބަހުން ވާހަކަ ދެއްކުމަކީ އުފަލެއް އަދި ފަޚުރެއް ކަމަށާއި އަދި ދިވެހިބަހަށް ވެވޭ ކޮންމެ އިހުމާލެއްގެ ސަބަބުން އަޅުވެތިކަމާއި ނިކަމެތިކަމުގެ ތެރެއަށް ދިވެހިން ވެއްޓިދާނެކަމަށް ރަައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

މިއަދު ފާހަގަކުރެވޭ ދިވެހިބަހުގެ ދުވަހުގެ މުނާސަބަތުގައި ފޮނުއްވި ޚިޠާބުގައި ރައީސް ވިދާޅުވީ، ދިވެހިރާއްޖޭގެ އަމިއްލަވަންތަކަމާއި މިނިވަންކަމުގެ އެންމެ އަގުހުރި އެއް ރަމްޒަކީ ދިވެހިބަސްކަމަށެވެ. އަދި ވާހަކަދައްކައި ލިޔެކިޔާނެ އަމިއްލަ ބަހަކާއި އަކުރުތަކެއް ލިބިފައި އޮތުމަކީ ވަރަށް ބޮޑު ނިޢުމަތެއްކަމުގައި އެމަނިކުފާނު ވިދާޅުވިއެވެ.

"ދިވެހީން، ދިވެހީންގެ ގޮތުގައި އެތައް ހާސް އަހަރަކު ދެމިތިބީ، ދިވެހިބަހުން ބަސްމޮށި އުޅޭތީކަން އެންމެ ހިނދުކޮޅަކަށްވެސް އަޅުގަނޑުމެން ހަނދާންނައްތާލައިގެން ނުވާނެ," ރައީސް ވިދާޅުވިއެވެ.

ރައީސް ވިދާޅުވީ، ދިވެހިބަހަށް ޚިދުމަތްކުރުމަކީ ސަރުކާރުން އެންމެ އިސްކަންދޭ އެއް ސިޔާސަތު ކަމަށެވެ. އަދި އަންނަން އޮތް ޖީލުތަކަށް ދިވެހިބަސް ފޯރުކޮށްދިނުމަށް އެއްބައިވަންތަކަމާއެކު މަސައްކަތްކުރުމަށް އެމަނިކުފާނު ވަނީ ބާރުއަޅުއްވާފައިއެވެ.

މީގެއިތުރުން، ދިވެހިބަހާއި އަދަބިއްޔާތާއި ޅެންވެރިކަމުގެ މުއްސަނދިކަމާއި މޮޅުކަން އަދުގެ ޖީލުތަކަށް މޭރުންވާނޭ ގޮތަށް ކިޔައިދީ އުނގަންނައިދިނުމަށް ވެސް ރައީސް ވަނީ އިލްތިމާސްކުރައްވާފައެވެ. އަދި ޒަމާނާ އެއްގޮތަށް ދިވެހިބަސް ކުރިއެރުވުމަށް މަސައްކަތްކުރުމުގެ މުހިންމުކަން ފާހަގަކުރައްވާފައިވެއެވެ.

ރައީސް ވިދާޅުވީ އަބަދުވެސް ދިވެހިބަހަށް އިސްކަން ދޭންވާނެކަމަށާއި،ދިވެހީންގެ އަމިއްލަވަންތަކަމުގެ މައިބަދައަކީ ދިވެހިބަސްކަމުގައި އެމަނިކުފާނު ފާހަގަކުރެއްވިއެވެ.