ސައުދީ ފަންޑް ފޯ ޑިވެލޮޕްމަންޓް (އެސްއެފްޑީ)ގެ މާލީ އެހީތެރިކަމާއެކު ހިންގާ މި ސަރުކާރުގެ ހައުސިން މަޝްރޫއުގެ މަސައްކަތް މިއަދު ފެށިފައިވާއިރު މިކަމުގެ އަމަލީ މަސައްކަތް މި އަހަރު ފަހު ކުއާޓަރުގައި ފަށާނެ ކަމަށް ހައުސިން މިނިސްޓްރީން މިއަދު ބުނެފި އެވެ.

އެސްޑީއެފްޑީއާ އެކު ހުޅުމާލޭގައި 400 ހައުސިން ޔުނިޓްގެ މަޝްރޫއެއް މިއަދު އިފްތިތާހުކުރުމާ ގުޅިގެން ހައުސިން މިނިސްޓްރީން ނެރުނު ނޫސްބަޔާނުގައި ބުނީ މި މަޝްރޫއުގެ މިހާރު ކުރިއަށް ގެންދަނީ ކޮންސަލްޓަންސީ ފާމެއް ހޮވުމުގެ މަރުހަލާ ކަމަށެވެ. އަދި މި އަހަރުގެ ފަހު ކުއާޓަރުގައި އަމަލީ މަސައްކަތް ފަށާނެ ކަމަށް އެ ބަޔާނުގައި ބުންޏެވެ.

ހައުސިން މިނިސްޓްރީން ބުނީ މި މަޝްރޫއު ވާނީ ރައީސް ޑރ. މުހައްމަދު މުއިއްޒުގެ އެންމެ މުހިންމު އެއް ވައުދުފުޅު ކަމަށްވާ ކޮންމެ ރައްޔިތަކަށް ބޯހިޔާވަހިކަމުގެ ފުރުސަތު ފަހިކޮށްދެއްވުމުގެ ސިޔާސަތުގެ ތެރެއިން ކުރިއަށް ގެންދިއުމަށް ހަމަޖެހިފައިވާ އެއް މަޝްރޫއަށް ކަމަށެވެ.

މި މަޝްރޫއަކީ 25 މިލިއަން ޑޮލަރުގެ ލޯނު އެހީގައި ހިންގާ މަޝްރޫއެއް ކަމަށް ހައުސިން މިނިސްޓްރީން ބުންޏެވެ.

ކުރީ ސަރުކާރުން ދައުލަތަށް ޖެއްސި ބުރަތަކުގެ ސަބަބުން މަޝްރޫޢުތައް ނުހިންގިގެން އެއްބަޔަކު ޝަކުވާ ވެސް ކުރިއެވެ. އެ ވާހަކަތަކާއި ގުޅިގެން ރައީސް މީގެ ކުރިން ވެސް ވިދާޅުވެފައި ވަނީ މި އަހަރުގެ ދެވަނަ ކުއާޓާ ފެށޭއިރު މަޝްރޫއުތައް ފެށިގެން ދާނެ ކަމަށް އުންމީދުކުރައްވާ ކަމަށެވެ.

ހުޅުލޭގައި މިއަދު ބޭއްވި މި މަޝްރޫއު އިފްތިތާހުކުރުމުގެ ރަސްމިއްޔާތުގައި ބައިވެރިވެވަޑައިގަތީ ފިނޭންސް މިނިސްޓަރު މޫސާ ޒަމީރާއި އެސްއެފްޑީގެ ސީއީއޯ ސުލްތާން ބިން އަބްދުއްރަހްމާން އަލް-މަރްޝަދެވެ.