މަސްވެރިކަމާ ބެހޭ ވުޒާރާއިން ފާއިތުވި ފަސް ދުވަހުގެ ތެރޭގައި ރާއްޖޭގެ ހަތަރު ސަރަޙައްދެއްގައި އައު ހަތަރުކަނދު ފަތި އަޅައިފިއެވެ. މި ކަނދުފަތިތައް އަޅާފައިވަނީ ކ. ގާފަރު، ނ. މާފަރު، ށ. ނަލަންދޫ އަދި ހދ. ކުޅުދުއްފުށީގެ ސަރަޙައްދުތަކުގައެވެ.

މި މަހުގެ 9 ވަނަ ދުވަހު ކ. ގާފަރުގެ އިރުން 13.5 މޭލު ބޭރުގައި ދޮށީ ކަނދުފަތި އަޅާފައިވާއިރު، 10 ވަނަ ދުވަހު ނ. މާފަރުގެ އިރުން 9.5 މޭލު ބޭރުގައިވެސް ދޮށީ ކަނދުފައްޗެއް އަޅާފައިވެއެވެ. މީގެ އިތުރުން 12 ވަނަ ދުވަހު ށ. ނަލަންދޫ ކައިރީގައި ވަދު ކަނދުފަތި އަޅާފައިވާއިރު، 13 ވަނަ ދުވަހު ހދ. އަތޮޅު ކުޅުދުއްފުށީ އިރު ދެެކުނުން 15.5 މޭލު ބޭރުގައި ދޮށީ ކަނދުފަތި އަޅާފައިވެއެވެ.

ކަނދުފަތިތަކަކީ ދޮށީގެ މަސްވެރިކަން ކުރާ ފަރާތްތަކުގެ މަސައްކަތަށް ފަސޭހަކޮށްދިނުމުގެ ގޮތުން، އެއް ދިމާލަކަށް މަސް ޖަމާވާ ގޮތަށް ކަނޑަށް ފައްތާފައި އޮންނަ ބޮއެކެވެ. ކަނދުފަތީގައި އަޅާ ހިޔަނީގެ ސަބަބުން، ކަނދުފަތީގެ ގާތަށް މަސް ޖަމާވެ، މަސްވެރިކަން ތިޔާގިވެގެންދެއެވެ.

ރާއްޖޭގައި މިހާރު އަޅަމުންދަނީ ދެބާވަތެއްގެ ކަނދުފައްޗެވެ. އެއީ ކަޅުބިލަމަހުގެ މަސްވެރިކަމަށް ޚާއްޞަކޮށްފައިވާ ދޮށީ ކަނދުފައްޗާއި، ސްޕޯޓްސް ފިޝިންއަށް އަޅާފައިވާ ވަދު ކަނދުފައްޗެވެ. ވަދު ކަނދުފަތިތައް ފަރުމާކޮށްފައިވަނީ ދޮށީގެ މަސްވެރިކަމަށް ޚާއްޞަކޮށްފައިވާ ކަނދުފަތިތަކާ ވަކިކުރުމަށް ފަސޭހަވާ ގޮތަށް ރީނދޫ ކުލައިގައެވެ.