ރާއްޖޭގައި އިމާރާތް ކުރާ އޮލިމްޕިކް ސައިޒުގެ ސްވިމިންގ ޕޫލްގެ ބިންގާ އިއްޔެ އަޅައިފިއެވެ.
މި ޕޫލްގެ ބިންގާ އަޅައިދެއްވީ ޕޫލަށް ފަންޑުކޮށްދެއްވާ ޗަމްޕާ ހުސައިން އަފީފް އާއި، ކުޅިވަރާއި ބެހޭ ވަޒީރު އަބްދުﷲ ރާފިޢު އާއި ސްވިމިންގ އެސޯސިއޭޝަންގެ ރައީސް، މުޙައްމަދު ޢަބްދުއްސައްތާރު އާއި، ޕޫލުގެ ކޮންޓްރެކްޓަރ، މާލާ ހައިރައިޒިންގ ކޮންސްޓްރަކްޝަން ކޮމްޕެނީ ޕވޓ ލޓޑ ގެ މެނޭޖިންގ ޑިރެކްޓަރު، ޢަލީ އިސްމާޢީލް އާއި، ފެތުމުގެ ކުޅިވަރުން ރާއްޖެއަށް އެންމެ ފުރަތަމަ މެޑަލް ހޯދައިދިން ފެތުންތެރިޔާ، އާމިނަތު ޝަޖަން އެވެ.
ޕޫލްގެ ބިންގާ އެޅުމަށް ބޭއްވި ރަސްމިއްޔާތުގައި ގިނަ ޢަދަދެއްގެ ފެތުންތެރިންނާއި، ކޯޗުންނާއި ބެލެނިވެރިން ވެސް ބައިވެރިވެލެއްވިއެވެ.
ހުޅުމާލެ ސްޕޯސްޓް ކޮމްޕްލެކްސް ޢިމާރާތާ ޖެހިގެން އޮންނަ ބިމުގައި ޤާއިމްކުރާ މި ސްވިމިން ޕޫލަކީ ވިޔަފާރިވެރިޔާ ޗަމްޕާ މުހައްމަދު މުސާގެ އެހީތެރިކަމުގައި ޤާއިމްކުރާ ބައިނަލްއަޤުވާމީ ފެންވަރުގެ ސްވިމިން ޕޫލެކެވެ.
ހަތަރު ބުރިއަށް ހަދާ މި ސްވިމިން ކޮމްޕްލެކްސްގައި 50 މީޓަރުގެ ޕޫލެއް އަދި 25 މީޓަރުގެ ޕޫލެއް ޤާއިމްކުރާނެއެވެ. އަދި ފެތުމުގެ ތަމްރީނުތައް ހެދުމަށް ބޭނުންވާ އެންމެ ޒަމާނީ ވަސީލަތްތައް ވެސް އެތަނުގައި ޤާއިމްކުރުމަށް ހަމަޖެހިފައިވާއިރު، ތަން ޑިޒަައިން ކޮށްފައިވަނީ އެއްފަހަރާ 1،500 މީހުންނަށް ބޭނުން ކުރެވޭ ގޮތަށެވެ.
