ދަރިން ތަރުބިޔަތުކޮށް، ދިވެހިރާއްޖޭގެ ތަޢުލީމީ މަންހަޖުގައި ބަޔާންކުރާ ފަދައިން، އިސްލާމް ދީނަށާއި ޤައުމަށް ވަފާތެރި، ފައިދާހުރި ބަޔަކަށް އެ ކުދިން ހެދުމުގައި އެދުރުންގެ ދައުރު ވަރަށް ބޮޑު ކަމަށް މިއަދުގެ ހުކުރު ޚުޠުބާގައި ބުނެފިއެވެ.
ޚުޠުބާގައި ބުނީ އެފަދަ ތަރުބިޔަތެއް އެ ކުދިންނަށް ދެވޭނީ ކެތްތެރިކަމާއި، ޙިކުމަތްތެރިކަމާއެކު، އެ މަސްއޫލިއްޔަތު އަދާކޮށްގެން ކަމަށެވެ.
އިސްލާމީ ރިސާލަތު ފެށުނީ، ކިޔެވުމަށް ކުރެއްވި އަމުރުފުޅުންކަން ޚުޠުބާގައި ފާހަގަކުރިއެވެ. މާތް اللهގެ މި އަމުރުފުޅާ އެއްގޮތްވާ ގޮތުގެ މަތީން، މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ ތަޢުލީމު ފެތުރުއްވުމަށް ވަރަށް ބޮޑު އިސްކަމެއް ދެއްވިކަމަށް ޚުޠުބާގައި ބުންޏެވެ. އަދި އިސްލާމީ ތަޢުލީމު ޢާންމުވުމުގެ ސަބަބުން ދުނިޔޭގެ ކަންކޮޅުތަކުގައި ސުލްޙަމަސަލަސްކަން ޤާއިމުވިކަމަށް ޚުޠުބާގައި ބުންޏެވެ.
މި ފެށުނު ދިރާސީ އަހަރު، އިސްލާމް ދީނާއި ދުންޔަވީ ރޮނގުތަކުން އިތުރު ކުރިއެރުންތަކެއް ލިބޭތޯ ގަދައަޅައި މަސައްކަތްކުރުމަށް ޚުޠުބާގައި ވަނީ ގޮވާލާފައެވެ. އަދި މައިންބަފައިންނާއި ދައުލަތުން ކުދިންގެ ތަޢުލީމާއި ތަރުބިޔަތަށްޓަކައި ތަނަވަސްކޮށްދީފައިވާ ފުރުޞަތުތަކުގެ ބޭނުން ހިފުމަށް ޚުޠުބާގައި ވަނީ ގޮވާލާފައެވެ.
ދަރީންނަކީ މާތް الله އަހަރެމެންނާ ޙަވާލު ކުރައްވާފައިވާ އަމާނާތެއްކަން ފާހަގަކޮށް ޚުޠުބާގައި ބުނީ މިއަދު އެ ކުދިން ހެޔޮ ގޮތުގައި ތަރުބިޔަތު ކުރެވިއްޖެ ނަމަ، މާދަމާ އެ ކުދިންގެ މަންފާ އަހަރެމެންނަށް ކުރާނެ ކަމަށެވެ. އެގޮތުން ދަރިންނަށް އިސްލާމީ ރިވެތި އަދަބާއި އުޅުން ދަސްކޮށްދީ، ކީރިތި ޤުރްއާނާއި، މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ ގެ ސުންނަތަށް ޢަމަލުކުރަން ދަސްކޮށްދީ، ފަރުޟު ފަސް ނަމާދު އަދާކުރާ ބަޔަކަށް އެ ކުދިން ހެދުމަށް ޚުޠުބާގައި ވަނީ ގޮވާލާފައެވެ.
ޚުޠުބާގައި އިތުރަށް ބުނީ ދަރިންނަށް ޢިލްމުގެ އިތުރުން އަދަބާއި އުޅުންތެރިކަން ދަސްކޮށްދިނުމަކީ ޤައުމުގެ ބިންގާ ހަރުދަނާކުރުމުގެ ގޮތުން އެޅޭ ވަރަށް ބޮޑު ބާރެއް ކަމަށެވެ.
ޢިލްމާއި ހުނަރާ އެއް ވަރަށް އެ ކުދިންގެ އަޚްލާޤު ވެސް ރިވެތިކޮށް ބައްޓަންކޮށްދީ، އިސްލާމްދީނަށް ލޯބިކުރާ އިސްލާމީ އުޞޫލުތަކުގައި ހިފަހައްޓާ ދަރިންތަކަކަށް އެ ކުދިން ހެދުމަށް މުދައްރިސުންނާއި ބެލެނިވެރިން ގުޅިގެން މަސައްކަތް ކުރުމަށް ޚުޠުބާގައި ވަނީ ގޮވާލާފައެވެ.
