ތައިލެންޑަށް ދަތުރުކުރާ ދިވެހިން އެރައިވަލް ކާޑު ފުރިހަމަކުރަން ޖެހޭގޮތަށް ހަމަޖައްސައިފިއެވެ.
ހާރިޖީ ވުޒާރާއިން ބުނީ ތައިލެންޑްގެ އިމިގްރޭޝަން އުޞޫލުތަކަށް ގެނައި ބަދަލުތަކަކާ ގުޅިގެން 1 މޭ 2025 އިން ފެށިގެން ތައިލެންޑަށް ދަތުރުކުރާ ކޮންމެ ޕެސެންޖަރަކު ތައިލެންޑަށް އެތެރެވުމުގެ ކުރިން "ތައިލެންޑް ޑިޖިޓަލް އެރައިވަލް ކާޑު" ފުރިހަމަކުރަންޖެހޭ ގޮތަށް ތައިލެންޑް އިމިގްރޭޝަނުން ހަމަޖައްސާފައިވާ ކަމަށެވެ.
އޮންލައިންކޮށް އެ ފޯމް ފުރުމަށް ހަމަޖެހިފައިވަނީ ދަތުރަށް ފެށުމުގެ ތިން ދުވަހުގެ ތެރޭގައެވެ.
މީގެ ސަބަބުން، ރާއްޖެއާއި ތައިލެންޑްއާ ދެމެދު ހަމަޖެހިފައިވާ ވިސާގެ އެއްވެސް އިންތިޒާމަކަށް ނުވަތަ ސިޔާސަތަކަށް ބަދަލެއް އައިސްފައިނުވާ ކަމަށް ހާރިޖީ ވުޒާރާއިން ބުންޏެވެ. އަދި، ކުރިއެކޭ އެއްގޮތަށް ދިވެހިންނަށް މިހާރުވެސް 90 ދުވަހުގެ "އެންޓްރީ ވިސާ" ގައި ތައިލެންޑަށް ދަތުރު ކުރެވޭނެ ކަމަށް ވުޒާރާއިން ބުންޏެވެ.
އެގޮތުން ތައިލެންޑަށް ދަތުރުކުރާ ފަރާތްތަކުން، ދިވެހިރާއްޖެއިން ފުރުމުގެ ކުރިން ތައިލެންޑް ޑިޖިޓަލް އެރައިވަލް ކާޑު އޮންލައިންކޮށް ފުރުމަށް ވުޒާރާއިން ވަނީ އިލްތިމާސްކޮށްފައެވެ. އަދި ރާއްޖެއިން ބޭރުގައި އުޅޭއިރު އެޤައުމެއްގެ ޤާނޫނާއި ޤަވާޢިދުތަކަށް ހުރުމަތްތެރިކޮށް ހިތުމަށްވެސް ވުޒާރާއިން ވަނީ އިރުޝާދު ދީފައެވެ.
