ޒަޔަނިސްޓް އިސްރާއީލުގެ ޚާރިޖީ ވަޒީރު ޣަދްޣޫން ސާއިރު ޔުނައިޓެޑް އަރަބް އިމަރޭޓްސް (ޔޫއޭއީ) އަށް ގޮސް ޔޫއޭއީ ގެ ޚާރިޖީ ވަޒީރު އަބްދުﷲ ބިން ޒާޔިދު އާ ބައްދަލުކުރައްވައި ގުޅުން ބަދަހި ކުރުމަށް މަޝްވަރާ ކުރައްވައިފިއެވެ.
މި ބައްދަލުވުމުގައި ޝެއިޚް ޝެއިޚް އަބްދުالله ބިން ޒައިދް އައްނަހްޔާން ވަނީ މެދުއިރުމަތީގައި ހަރުކަށި ފިކުރުތަކާއި އަނިޔާވެރިކަން ނިމުމަކަށް ގެނައުމަށް ބައިނަލްއަގްވާމީ ގޮތުން ގުޅިގެން މަސައްކަތް ކުރުމުގެ މުހިންމުކަމަށް އަލިއަޅުވާލައްވާފައި ކަމަށައި، ރަހީނުން ބަދަލުކުރުމުގެ އެއްބަސްވުމެއްގެ ބްރޯކަރކޮށް، ދާއިމީ ހަނގުރާމަ ހުއްޓާލުމާއި، ޣައްޒާއަށް އިންސާނީ އެހީ ރައްކާތެރިކަމާއެކު ފޯރުކޮށްދިނުމުގެ މަގުސަދުގައި ގަތަރާއި މިސްރާއި އެމެރިކާއިން ކުރާ މެދުވެރިކަމުގެ މަސައްކަތްތަކަށް ޔޫއޭއީން ތާއީދުކުރާކަން ތަކުރާރުކުރައްވާފައި ކަމަށް ޔޫއޭއީން ބުނެއެވެ.
އަބޫދަބީގައި ދެއްވި ބަޔާނެއްގައި އިސްރާއީލުގެ ޚާރިޖީ ވަޒީރު ވަނީ ޔޫއޭއީން އިސްރާއީލަށް ކުރާ އިތުބާރާއި ބާއްވަމުން ގެންދާ ގާތް ގުޅުންތަކާ ގުޅިގެން ޔޫއޭއީގެ ސަރުކާރަށް ވަރަށް ބޮޑަށް ޝުކުރު އަދާކޮށްފައެވެ.
Advertisement
އިސްރާއީލެކޭ އެއްގޮތަށް ޔޫއޭއީއަކީ ވެސް ފަލަސްތީނުގެ މިނިވަންކަމަށް ޖިހާދު ކުރާ ޖަމާއަތްތަކާއި އަދި ފަލަސްތީނުގެ މުޖާހިދުންނަކީ ޓެރަރިސްޓުން ކަމަށް ސިފަކުރާ ގައުމެކެވެ. އަދި ހަމާސް ކުށްވެރި ކުރައްވައި އދ.ގެ އެތައް ޖަލްސާތަކެއްގައި ޔޫއޭއީން ވަނީ ވާހަކަ ދައްކަވާފައެވެ.
އިސްރާއީލުން ޣައްޒާއަށް ހަމަލާދިނީ ހަމާސްގެ ސަބަބުންކަމަށް ވިދާޅުވެ އދ. ގައި ހުންނަވާ ޔޫއޭއީގެ މަންދޫބުވަނީ އިސްރާއީލުގެ ރަހީނުން މިނިވަންކޮށް ހަތިޔާރު ބަހައްޓައި އިސްރާއީލަށް އަމާން ދިނުމަށް އެތައް ފަހަރެއްގެ މަތިން ހަމާސް ޖަމާއަތަށް ގޮވާލައްވާފައެވެ.
އިސްރާއީލްގެ ދައުލަތް ގަބޫލްކޮށް އިސްރާއީލާ ގުޅުންތައް އުފައްދާފައިވާ މަދު އަރަބި ގައުމުތަކުގެ ތެރެއިން އިސްރާއީލާ އެންމެ ގާތް ގުޅުންތައް ބާއްވަމުން ގެންދާ ގައުމަކީ ވެސް ޔޫއޭއީއެވެ.
ޔޫއޭއީން 2020 ވަނަ އަހަރު އިސްރާއީލާ ގުޅުން އާންމުކުރިއިރު، ފަލަސްތީނުގެ ބައެއް ޖަމާއަތްތަކުން ވަނީ ޔޫއޭއީ އިން އިސްރާއީލާ ގުޅިގެން ޖާސޫސީ ހަރަކާތްތައް ހިންގާ ކަމަށެވެ.
