ޢުމްރާގެ އަޅުކަމަށްފަހު އަންނަ ފަރާތްތަކުން ރޯގާޖެހި ބޮޑުވަރުވާނަމަ ލަސްނުކޮށް ޑޮކްޓަރަށް ދެއްކުމަށް ހެލްތް ޕްރޮޓެކްޝަން އޮތޯރިޓީ (އެޗްޕީއޭ) އިން އިލްތިމާސްކޮށްފިއެވެ.

މި ރަމަޟާން މަހުގެ ފަހު ދިހައެއްގައި ޢުމްރާގެ އަޅުކަން އަދާކުރުމަށް ޙައްޖު ކޯޕަރޭޝަންގެ ހަވާލުގައި ޖުމްލަ 577 މީހުން ޢުމްރާއަށް ދިޔައެވެ. މީގެ އިތުރުން، އަމިއްލަ ކުންފުނިތަކުގެ ހަވާލުގައިވެސް އެތައް ބަޔަކު ރަމަޟާންމަހު ޢުމްރާގެ އަޅުކަމަށް ދިޔައެވެ. މިހާރު ވަނީ ޢުމްރާވެރިން ރާއްޖެ އަންނަން ފަށާފައެވެ.

އެޗްޕީއޭއިން ބުނީ ޢުމްރާއަށްފަހު އަންނަ މީހުން އަރިދަފުސް ރޯގާޖެހި ކެއްސާ، ކިނބިހި އަޅާއިރު އަނގައާއި ނޭފަތް ނިވާކުރުމަށާއި، ޓިޝޫފަދަ ތަކެތި ބޭނުންކުރުމަށްފަހު ރައްކާތެރި ގޮތުގައި އެތަކެތި ނައްތާލަން ވާނެކަމަށެވެ. އަދި ސައިބޯނި ލައިގެން ގިނައިން އަތް ދޮވުމަށްވެސް އެޗްޕީއޭއިން އިލްތިމާސްކުރިއެވެ.

އެޗްޕީއޭއިން އިތުރަށް ބުނީ ޢުމްރާއިން އެނބުރި އައިތާ 14 ދުވަހުގެ ތެރޭގައި ހުން އައިސް، ކެއްސައި، ނޭވާލާން އުނދަގޫވެ، މޭގައި ރިއްސުންފަދަ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށެވެ. އަދި ރޯގާ ނޫން އެހެން ބައްޔެއްގެ އަލާމާތެއް ފެންނަނަމަވެސް ޑޮކްޓަރަށް ދެއްކުމަށްވެސް އެޗްޕީއޭއިން ވަނީ އިލްތިމާކޮށްފައެވެ.

އެޗްޕީއޭއިން ބުނީ ޑޮކްޓަރަށް ދައްކާއިރު ޙައްޖު ނުވަތަ ޢުމްރާއިން އެނބުރި އައި މީހެއްކަމުގެ މަޢުލޫމާތު ދޭންވާނެ ކަމަށެވެ.

ޢުމްރާގެ އަޅުކަމަށްފަހު އުމްރާވެރިން ރާއްޖެ އައުމަށް ހަމަޖެހިފައިވަނީ މި މަހުގެ 4، 5 އަދި 7 ވަނަ ދުވަހުއެވެ.