ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހިންގެ ދިރިހުރުމާއި، ފުރާނައާއި، ޞިއްޙަތާއިމެދު ވިސްނާވަޑައިގެން، މުހިންމު ސިޔާސަތެއްގެ ނިންމުމަކާ މެދު ޢާންމުންގެ ޚިޔާލު އެއްކުރުމަށް ސޯޝަލް މީޑިއާގައި އިއްޔެ ހުޅުވި ޕޯލަކީ މީގެ ކުރިން އެއްވެސް ރައީސެއްގެ ކިބައިން މިޤައުމުގެ ލޮލަށް ފެނުނު ކަމެއް ނޫނެވެ.
މިއީ މާސް މީޑިއާ ޕްލެޓްފޯމެއް މެދުވެރިކޮށް ރާއްޖޭގެ ރައީސަކު ރައްޔިތުންގެ ޚިޔާލު ހޯއްދެވި ފުރަތަމަ ފަހަރެވެ.
Advertisement
ރައީސް މުއިއްޒުގެ ރަސްމީ "އެކްސް" އެކައުންޓުން އިފްތިތާޙްކޮށް، ޒުވާން ޖީލުގެ ތެރޭގައި ދުންފަތުގެ އިސްތިޢުމާލުކުރުން މަދުކުރުމުގެ މަޤްޞަދުގައި “ޖީލުތަކުން މަނާކުރުމަށް” ހުށަހަޅާފައިވާ މަނާކުރުމާއި ގުޅޭ ގޮތުން އެދިވަޑައިގަންނަވަނީ ޚިޔާލަށެވެ އެވެ. ޕޯލްގައި ހުށަހެޅި ހުށަހެޅުންތަކަކީ؛
ޖެނުއަރީ 1، 2007 އިން ފެށިގެން އުފަންވާ ހުރިހާ ކުދިންނަށް ދުންފަތުގެ އިސްތިއުމާލުކުރުން މަނާކުރުން.
ޖެނުއަރީ 1، 2004 އިން ފެށިގެން އުފަންވާ ހުރިހާ ކުދިންނަށް ދުންފަތުގެ އިސްތިއުމާލުކުރުން މަނާކުރުން.
ޖެނުއަރީ 1، 2000 އިން ފެށިގެން އުފަންވާ ހުރިހާ ކުދިންނަށް ދުންފަތުގެ އިސްތިއުމާލުކުރުން މަނާކުރުން.
ރައްޔިތުންގެ މަޖިލީހުގެ ތާއީދާއެކު މިފަދަ ޤާނޫނެއް ފާސްކުރުމުގެ ދުސްތޫރީ ބާރު ރައީސަށް ލިބިވަޑައިގެންނެވި ނަމަވެސް، ރައްޔިތުންނާއި ގާތުން ގުޅިގެން މަސައްކަތް ކުރެއްވުމަށް ބާރުއަޅުއްވަމުން ޢާންމުންނާއި މަޝްވަރާ ކުރެއްވުމަށް އެމަނިކުފާނު އިޚްތިޔާރު ކުރައްވައެވެ.
ފަހަގަކޮށްލަން ޖެހޭ ކަމަކީ މި ޕޯލްގެ އިތުރުން ރައީސް ޑރ. މުޢިއްޒު ވަނީ ހާމަކަން ބޮޑުކޮށް ޢާންމުންނާއި މުޢާމަލާތް ކުރުމުގެ މަޤްޞަދުގައި ބައެއް މަސައްކަތްތައް ތަޢާރަފް ކުރައްވާފައެވެ. "ރައީސުލްޖުމްހޫރިއްޔާގެ ޖަވާބު" ސިލްސިލާގެ ދަށުން ރައްޔިތުންނަށް ސުވާލުތައް ސީދާ ރައީސުލްޖުމްހޫރިއްޔާއަށް ހުށަހެޅުމުގެ ފުރުޞަތު ލިބިގެންދާއިރު، ވީޑިއޯ މެދުވެރިކޮށް ޖަވާބު ފޯރުކޮށްދެވޭނެއެވެ. "ރައްޔިތުންނާއެކު" ޕޮޑްކާސްޓުން މި ގުޅުން އިތުރަށް ބަދަހިކޮށް، ރައީސުލްޖުމްހޫރިއްޔާއަށް ރައްޔިތުންގެ ވިސްނުންތަކާއި ޚިޔާލުތައް ޙިއްސާކޮށް، ކަންބޮޑުވުންތައް ޙައްލު ކުރެވޭނެއެވެ.
މީގެ އިތުރުން، މުޅި ރާއްޖޭގެ ރަށްރަށަށް ޒިޔާރަތްކޮށް، ރައްޔިތުންނާއި ސީދާ ގުޅިގެން ރައްޔިތުންގެ ބޭނުންތައް ދެނެގަނެ، ކަންކަމުގައި ޙައްލުތައް ހުށަހަޅުއްވައިގެން ރައީސް ވަނީ ވަޑައިގެންފައެވެ. މި އަތްމަތީ އުޞޫލުން ރައްޔިތުންނާއި ގާތުން ގުޅިގެން ވެރިކަން ކުރުމަށް އެމަނިކުފާނު ކުރައްވާ ޚިދުމަތްތެރިކަން ހާމަވެގެންދާއިރު، ހާމަކަން ބޮޑުކަމާއި ހުރިހާ އެންމެންނަށް ވެސް ޝާމިލްވާ ޒަމާނެއް އެމަނިކުފާނު މިވަނީ ރައްޔިތުންނަށް ގެނެސްދެއްވާފައެވެ.
ރައީސް ޑރ. މުޢިއްޒުގެ ޢަމަލުފުޅުތަކަކީ ވެރިކަން ހިންގުމުގައި ޢާންމުންގެ ބައިވެރިވުމުގެ މުހިންމުކަން ޤަބޫލުފުޅުކުރައްވާ ކަމުގެ ހެކިތަކެކެވެ. ރައްޔިތުންނާއި ވާހަކަތައް ހުޅުވާލުމަށް ސޯޝަލް މީޑިއާ އާއި އެހެނިހެން ޕްލެޓްފޯމްތައް ބޭނުންކޮށްގެން އެމަނިކުފާނު ގެންދަވަނީ ރައްޔިތުންނާއި ދެމެދު އޮންނަ ގުޅުން އިތުރަށް ކަށަވަރުކޮށް، ޤައުމުގެ ކުރިމަގު ބައްޓަންކުރާ މުހިންމު ނިންމުންތަކުގައި އެމީހުންގެ އަޑު އިވޭނެކަން ކަށަވަރުކޮށްދެމުންނެވެ.
