އިންޓަނޭޝަނަލް ކްރިމިނަލް ކޯޓް (އައިސީސީ) އިން ހަންގޭރީ ވަކިވާން ނިންމާފައިވާކަން މިއަދު އިއުލާން ކޮށްފިއެވެ.

ހަންގޭރީން ބުނީ ދުނިޔޭގެ ޖިނާޢި ކޯޓުން ވަކިވާން އެ ގައުމުން ނިންމާފައި ވަނީ އެ ކޯޓު ސިޔާސީ ކުރުމާއި ގުޅިގެންނެވެ. ބޮޑުވަޒީރު ވިކްޓަރ އޮރްބާން ވިދާޅުވީ އައިސީސީގެ އަސްލު މަގުސަދުން އެއްކިބާވެ ސިޔާސީ ޖަމާއަތަކަށް ވެފައިވާ ކަމަށެވެ.

ބެލެވޭ ގޮތުގައި ހަންގޭރީން މިގޮތަށް ނިންމީ މިއަދު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހަންގޭރީއަށް ކުރެއްވި ދަތުރުފުޅާއި ދިމާކޮށް، އޭނާ ހައްޔަރު ނުކުރަން ވެގެންނެވެ. ޣައްޒާގައި ހިންގާ ހަނގުރާމައިގެ ޖަރީމާތަކާއި ގުޅިގެން އައިސީސީން ވަނީ ނަތަންޔާހޫ ހައްޔަރު ކުރުމުގެ އަމުރެއް ނެރެފައެވެ.

އެ އަމުރު ނެރުމުން ވެސް އެއީ ބާރެއް ހުރި އަމުރަކަށް ނުވާނެ ކަމަށް މުހައްލިލުން ދިޔައީ ބުނަމުންނެވެ.

ހަންގޭރީން މިއަދު އައިސީސީން ވަކިވުމުން، ނަތަންޔާހޫ ހައްޔަރުކުރުމަށް އައިސީސީން ނެރެފައިވާ އަމުރު ތަންފީޒު ކުރާކަށް ހަންގޭރީއަކަށް ގާނޫނީ ގޮތުން ވާޖިބެއް ނުވާނެ ކަމަށް އެ ގައުމުން ބުނެއެވެ.

ނަމަވެސް މިކަމާއި ގުޅިގެން ޑަޗް ފޮރިން މިނިސްޓަރު ކަސްޕާ ވެލްޑްކަމްޕް ފާހަގަކުރެއްވި ގޮތުގައި ހަންގޭރީން އަމިއްލައަށް އެހެން ނިންމި ކަމުގައި ވިޔަސް، ރަސްމީގޮތުން ވަކިވުމުގެ މަރުހަލާ ނިމެންދެން އައިސީސީގެ މެންޑޭޓްތަކަށް އަމަލުކުރުން ހަންގޭރީގެ މައްޗަށް ލާޒިމްވާނެއެވެ.

ހަންގޭރީން އައިސީސީން ވަކިވިއިރު މިއީ ޔޫރަޕުން އެ ކޯޓުން ވަކިވި ފުރަތަމަ ގައުމެވެ.

މިއަހަރުގެ ފެބުރުއަރީ 24 ގައި އަފްޣާނިސްތާން ވަނީ އައިސީސީން ވަކިވެފައެވެ. އޭގެކުރިން 2018 ވަނަ އަހަރު މާޗު 14 ވަނަ ދުވަހު ފިލިޕީންސް އިން އައިސީސީގެ މެންބަރުކަމުން ވަކިވިއިރު އޭގެ ކުރީ އަހަފު އޮކްޓޯބަރު 27 ވަނަ ދުވަހު ބުރޫންޑީންވެސް ވަނީ އައިސީސީން ވަކިވެފައެވެ.