ދުންފަތުގެ އިސްތިއުމާލުކުރުން މަދުކުރުމަށް ސިލްސިލާ ހަރުކަށި ސިޔާސަތުތަކެއް ތައާރަފްކޮށް، ރާއްޖޭގައި ދުންފަތުގެ އިސްތިއުމާލުކުރުމާއި ވޭޕާއި ދެކޮޅަށް ރައީސް ޑރ. މުޙައްމަދު މުޢިއްޒު ކުރައްވަމުންގެންދަވާ މި މަސައްކަތްތަކުގެ ތެރެއިން، ދުންފަތުގެ އިސްތިއުމާލުކުރުމާއި ވެޕިން ޕްރޮޑަކްޓްތަކަށް އިތުރު ހުރަސްތަކެއް އެޅުމަށް ތާއީދު ހޯދުމަށް އާންމު ޕޯލެއް ކުރިއަށް ގެންދަން ފައްޓަވައި ރައްޔިތުންގެ ޚިޔާލަށް ރައީސް އެދިވަޑައިގެންފިއެވެ.

މިކަމުގައި ރައީސް ވަނީ 3 ގޮތެއް ހުށަހަޅުއްވާފައެވެ؛

ރައީސް ހުށަހަޅުއްވާފައިވާ ތިން ގޮތަކީ 2000ވަނަ އަހަރުން ފެށިގެން އުފަންވެފައިވާ ކުދިންނަށް (25 އަހަރުން ދަށުގެ އުމުރުފުރާ) ނުވަތަ 2004ވަނަ އަހަރުން ފެށިގެން އުފަންވެފައިވާ ކުދިންނަށް (21 އަހަރުން ދަށުގެ އުމުރުފުރާ) ނުވަތަ 2007 ވަނަ އަހަރުން ފެށިގެން އުފަންވެފައިވާ ކުދިންނަށް (18 އަހަރުން ދަށުގެ އުމުރުފުރާ) ދުންފަތް މަނާކުރާގޮތަށް ކަނޑައެޅުމެވެ.

2024 ވަނަ އަހަރުގެ އޮކްޓޯބަރު މަހު ރައީސް މުއިއްޒު ވެޕިން ޑިވައިސް އެތެރެކުރުން މަނާކުރިކަން އިއުލާން ކުރެއްވިއިރު، އެކަމަށް އަމަލުކުރަން ފެށީ ނޮވެމްބަރު 15 އިން ފެށިގެންނެވެ.

ދުންފަތުގެ އިސްތިއުމާލުކުރުން އިތުރަށް ހުއްޓުވުމަށް މުއިއްޒު ހުށަހެޅުއްވީ "ޖެނެރޭޝަން މަނާ" ކުރުމަށާއި، ވަކި އަހަރަކަށް ފަހު އުފަންވާ ކުދިންނަށް ސިނގިރޭޓް ވިއްކުން ހުއްޓުވުމަށެވެ. މީގެ އިތުރުން ކަސްޓަމްސް މެދުވެރިކޮށް ދުންފަތުގެ ބާވަތްތަކަށް ނަގާ ޑިއުޓީ ބޮޑުކޮށް، ދުންފަތުން ރައްޔިތުންގެ ސިއްހަތަށް ލިބޭ ގެއްލުން ކުޑަކުރުމަށް މަސައްކަތް ފެއްޓެވިއެވެ. ނަތީޖާއަކީ ދުންފަތުގެ އިސްތިއުމާލުކުރުމަށް ކުރާ ހޭދަ އަގުބޮޑުވެގެން ދިޔުމެވެ.

ސޯޝަލް މީޑިއާގައި ރައީސް ޑރ. މުއިއްޒު މިހާރު ކުރިޔަށް ގެންދަވާ މި ޕޯލްގެ މަޤްޞަދަކީ، މި ފިޔަވަޅުތަކާމެދު އާންމުންގެ ޚިޔާލު ވަޒަންކުރުމާއި، މިއަށްވުރެ ހަރުކަށި ސިޔާސަތުތައް ތަޢާރަފްކުރަންވީތޯ ބެލުމެވެ. ގިނަޢާންމުންގެ ޚިޔާލުތައް ހުރި ގޮތް އޮޅުންފިލުއްވުމެވެ.

ދުންފަތުގެ އިސްތިއުމާލު ކުރުމަށް އިތުރަށް ހިތްވަރު ނުދިނުމުގެ ގޮތުން ސަރުކާރުން ވަނީ ސިނގިރޭޓާއި ބިޑިން އިމްޕޯޓް ޑިއުޓީ ބޮޑުކޮށްފަ އެވެ. ނޮވެމްބަރު 1، 2024 އިން ފެށިގެން މި އުފެއްދުންތަކުން އިމްޕޯޓް ޑިއުޓީގެ ވަކި ރޭޓެއް ކަނޑައެޅުމުން ސިނގިރޭޓަކަށް 3 ރުފިޔާއިން 8 އަށް މައްޗަށް ގޮސްފައިވެ އެވެ. ރައީސް މުއިއްޒު ވިދާޅުވީ މި ޓެކްސް ބޮޑުކުރުމުން ލިބޭ އިތުރު އާމްދަނީ ދޫކުރާނީ ދުންފަތުގެ އިސްތިއުމާލުކުރުން ހުއްޓާލުމުގެ ސިއްހީ ހިދުމަތްތަކަށް ކަމަށެވެ.

ޒުވާނުން ދުންފަތުގެ އިސްތިއުމާލު ކުރުމުގެ އާދަތައް ފެށުން ހުއްޓުވުމުގެ ގޮތުން ރައީސް މުއިއްޒު ހުށަހެޅުއްވީ ދުންފަތުގެ އިސްތިއުމާލުކުރުން "ޖީލެއް މަނާ" ކުރުމަށެވެ. މި ސިޔާސަތުގެ މަޤްޞަދަކީ ވަކި އަހަރަކަށްފަހު އުފަންވާ ފަރާތްތަކަށް ދުންފަތުގެ ބާވަތްތައް ވިއްކުން މަނާކޮށް، އޭގެ ނަތީޖާއެއްގެ ގޮތުން ދުންފަތުގެ އިސްތިޢުމާލު ނުކުރާ ޖީލެއް އުފެއްދުމެވެ.