އިންޑިއާއިން ރާއްޖެއަށް އެތެރެކުރާ ޒަރޫރީ ތަކެތީގެ ކޯޓާ އެ ޤައުމުން އިއްޔެ އިތުރުކޮށްދީފިއެވެ.

އިންޑިއާގެ ކޮމާސް އެންޑް އިންޑަސްޓްރީ މިނިސްޓްރީން ބުނީ ރާއްޖެއަށް އެކްސްޕޯޓުކުރާ ޒަރޫރީ ކާބޯތަކެތީގެ ބާވަތްތަކާއި، ކޮންސްޓްރަކްޝަން މަސައްކަތަށް ރާއްޖެ އެތެރެކުރާ މުދަލުގެ މިންވަރު އިތުރުކޮށްފައިވާ ކަމަށެވެ.

މިއީ 1981 ވަނަ އަހަރުން ފެށިގެން އިންޑިއާއިން ރާއްޖެއަށް ޒަރޫރީ ކާބޯތަކެތީގެ ބާވަތްތަކާއި ހިލަވެލި އެތެރެކުރުމަށް އެއްބަސްވެ، އެކަން ކުރަން ފެށިފަހުން ކޯޓާ އިތުރުކޮށްދިން އެންމެ ބޮޑު ޢަދަދުތައްކަން ފާހަގަކޮށްލެވެއެވެ.

ފާހަގަކޮށްލެވޭ ގޮތުގައި ހިލައާއި، ހިލަވެލި ރާއްޖެއަށް އެކްސްޕޯޓްކުރަން ކަނޑައަޅައިފައިވާ މިންވަރު ވަނީ %30 އިތުރުކޮށް، 1،300،000 މެޓްރިކް ޓަނަށް އިތުރުކޮށްފައެވެ.

މީގެ އިތުރުން ބިސް، އަލުވި، ފިޔާ، ހަކުރު، ފުށް، ހަނޑޫ ރާއްޖެއަށް އެކްސްޕޯޓް ކުރާ މިންވަރު ވަނީ %5 އިތުރުވެފައެވެ. މީގެ އިތުރުން މުގު އެތެރެކުރާ މިންވަރު %56 ވަނީ އިތުރުކޮށްފައެެވެ.

އިތުރުވި މިންވަރަކީ:

1. ބިސް: 448،913،750
2. އަލުވި: 22،589 މެޓްރިކް ޓަން
3. ފިޔާ: 37،537 މެޓްރިކް ޓަން
4. ހަނޑޫ: 130،429 މެޓްރިކް ޓަން
5. ފުށް: 114،621 މެޓްރިކް ޓަން
6. ހަކުރު: 67،719 މެޓްރިކް ޓަން
7. މުގު: 350 މެޓްރިކް ޓަން

އިންޑިއާއިން ޒަރޫރީ ކާބޯތަކެތި އެކްސްޕޯޓްކުރުން ވަރަށް ގިނަ ޤައުމުތަކަށް ހުއްޓާލި ނަމަަވެސް އެ ޤައުމުގެ ނެއިބަހުޑް ފަސްޓް ޕޮލިސީގެ ދަށުން ރާއްޖެއަށް އައީ އެ ތަކެތި އެކްސްޕޯޓް ކޮށްދެމުންނެވެ.

މީގެ އިތުރުން، ހިލޭ އެހީގެ ގޮތުގައި 600 ކްރޯޑު އިންޑިއަން ރުޕީސް (69 މިލިއަން ޑޮލަރު) ރާއްޖެއަށް ދިނުމަށް ވެސް އިންޑިއާގެ ބަޖެޓުގައި ވަނީ ހިމަނާފައެވެ.