ހއ. ކެލާގެ ފަޅު ތެރޭގައި ދެ ރިސޯޓު ތަރައްޤީކުރުމަށްޓަކައި އިންވެސްޓަރުން ހޯދުމަށް ސަރުކާރުން މިއަދު އިޢުލާނުކޮށްފިއެވެ. ޓޫރިޒަމް މިނިސްޓްރީން މިއަދު ގެޒެޓުކުރި އިޢުލާނުގައި ބަޔާންކޮށްފައިވާ ގޮތުގައި، މި ދެ ރިސޯޓު ތަރައްޤީކުރެވޭނީ 12.9 ހެކްޓަރުގެ ދެ ރަށް ހިއްކައިގެންނެވެ.
https://www.gazette.gov.mv/iulaan/333659
ސަރުކާރުން މާރިޗު 29 ގައި ނިންމާފައިވަނީ ކެލާގެ އިޚްތިޞާޞްގެ ތެރެއިން ޖުމުލަ 325.5 ހެކްޓަރުގެ ސަރަހައްދެއް މި މަޝްރޫޢުއަށް ކަނޑައެޅުމަށެވެ. މީގެ ތެރެއިން ފުރަތަމަ ރިސޯޓަށް ކަނޑައަޅާފައިވަނީ 169.3 ހެކްޓަރުގެ ސަރަހައްދެކެވެ. މި ސަރަހައްދުގެ އަގުގެ ގޮތުގައި ކަނޑައަޅާފައިވަނީ 2,032,110 އެމެރިކާ ޑޮލަރެވެ. ދެވަނަ ރިސޯޓަށް ކަނޑައަޅާފައިވާ 156.2 ހެކްޓަރުގެ ސަރަހައްދުގެ އަގަކީ 1,996,740 އެމެރިކާ ޑޮލަރެވެ.
މި ދެ ރިސޯޓު ތަރައްޤީކުރުމަށް ޝައުޤުވެރިވާ ފަރާތްތަކުން ބިޑު ހުށަހެޅުމުގެ ސުންގަޑިއަކީ ޖޫން 5 ވާ ހޯމަ ދުވަހުގެ މެންދުރު 13:00 އެވެ. އިންވެސްޓަރުން ހޮވުމުގައި އެންމެ ބޮޑު އިސްކަމެއް ދެވޭނީ ހުށަހަޅާ އަގަށެވެ. އަދި މީގެ އިތުރުން ތިމާވެށްޓާ ރައްޓެހި ތަރައްޤީއަށާއި، އިޖުތިމާޢީ ތަރައްޤީއަށް އަދި ކޯޕަރޭޓް ސޯޝަލް ރެސްޕޮންސިބިލިޓީއަށް ދޭ އަހައްމިއްޔަތުކަންވެސް ބެލޭނެއެވެ.
ކެލާގެ ފަޅުގައި ފަތުރުވެރިކަމުގެ ވަސީލަތެއް ތަރައްޤީކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މި މަޝްރޫޢުގެ ސަބަބުން ކެލާގެ ރައްޔިތުންނަށް، ޚާއްޞަކޮށް ޒުވާނުންނަށް، ގިނަ ވަޒީފާގެ ފުރުޞަތުތަކެއް ހުޅުވިގެންދާނެ ކަމަށް ރައީސް ވަނީ ރިޔާސީ ކެމްޕޭނުގައި ފާހަގަކުރައްވާފައެވެ.
