ފިޠުރު ޢީދުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި، އެ މަނިކުފާނުގެ އަނބިކަނބަލުން ސާޖިދާ މުޙައްމަދު، މިއަދު ހެނދުނު ޢީދު ސަލާން ކުރައްވައިފިއެވެ.

ރައީސުލްޖުމްހޫރިއްޔާގެ ރަސްމީ ގެ، މުލީއާގޭގައި ބޭއްވުނު މި ސަލާންކުރެއްވުން ކުރިއަށްދިޔައީ ހެނދުނު 9:00 އިން 11:00 އަށެވެ. މި ސަލާންކުރެއްވުމުގައި ވަޒީރުންނާއި، ރައްޔިތުންގެ މަޖިލީހުގެ މެންބަރުން، ސިޔާސީ ޕާޓީތަކުގެ އިސްވެރިން، ސްޓޭޓް މިނިސްޓަރުން، ރާއްޖޭގައި ތިއްބެވި ބޭރު ދައުލަތްތަކުގެ ސަފީރުން އަދި ސަރުކާރުގެ އޮފީސްތަކާއި ކުންފުނިތަކުގެ ވެރިން ބައިވެރިވެވަޑައިގެންނެވިއެވެ.

^{މިއަދުގެ ޢީދުސަލާން ކުތެއްވުމުގައި ދިފާޢީ ވަޒީރު ޣައްސާން މައުމޫން ރައީސްއާއި ސަލާން ކުރައްވަނީ.}

މީގެ އިތުރުން، ގިނަ ޢަދަދެއްގެ އާންމު ރައްޔިތުންނާއި ޢާއިލާތަކުންވެސް ޢީދުގެ ސަލާން ކުރެއްވުމުގައި ބައިވެރިވެފައިވާކަން ފާހަގަކުރެވެއެވެ. ރައީސުލްޖުމްހޫރިއްޔާގެ އޮފީހުން ވަނީ މި ސަލާންކުރުމުގައި ބައިވެރިވުމަށް ދިވެހި ރައްޔިތުންނަށް ދަޢުވަތު އަރުވާފައެވެ.

_{ރައީސުލްޖުމްހޫރިއްޔާގެ ދެކަނބަލުން ޢީދުސަލާން ކުރެއްވުން.}

މިއީ ޢީދުގެ އުފާވެރިކަން ހިއްސާކުރުމާއި، ޤައުމީ އެއްބައިވަންތަކަން އާލާކުރުމަށް މުހިންމު ދައުރެއް އަދާކުރާ ކަމެކެވެ.

ރައީސުލްޖުމްހޫރިއްޔާގެ ދެކަނބަލުން ވަނީ މިދިޔަ އަހަރުވެސް ފިޠުރު ޢީދު ދުވަހު ޢީދު ސަލާންކުރެއްވުން ކުރިއަށް ގެންދަވާފައެވެ.