ރާއްޖޭގައި ދީނީ ހޭލުންތެރިކަން އިތުރުކޮށް ޙާފިޡުންގެ ޢަދަދު އިތުރުކުރުމަށް ސަރުކާރުން މަސައްކަތް ކުރަމުންދާ ދަނޑިވަޅުގައި އަނެއްކާވެސް 24 ހާފިޒުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ގައުނާއި ހަނދާނީ ލިޔުން ދެއްވައިފި އެވެ.
ރާއްޖޭގައި ފުރަތަމަ ފަހަރަށް ބޭއްވުނު ޙާފިޡުމް ދަސްވެނިވުމުގެ ހާއްސަ ހަފުލާގައި އެމަނިކުފާނު ވަނީ ޙާފިޡް ކަމުގެ ސަނަދު ޙާޞިލް ކުރުމަކީ ފަޚުރުވެރިވާން ޖެހޭނެ ކަމެއް ކަމަށެވެ.
ޙާފިޡުންނަށް ހިއްވަރު ދެއްވަމުން އެމަނިކުފާނު ވިދާޅުވީ ، މިއީ ސައްތައިންސައްތަ އިސްލާމީ ޤައުމަކަށް ވާތީ ޙާފިޒުންގެ ގޮތުގައި ދަސްވެނިވާންޖެހޭނީ އަހަރަކު މިއަށްވުރެ ގިނައިންކަމަށާއި، ކީރިތި ޤުރްއާން ހިތުދަސް ގިނަ ކުދިންތަކެއް އުފެއްދުމަށް އެންމެން ގުޅިގެން މަސައްކަތް ކުރުމަށް ދިވެހި ހުރިހާ ލޮބުވެތި ރައްޔިތުންނަށް ގޮވާލައްވާކަމަށެވެ.
ގުރުއާން ހިތުދަސްކޮށް ހާފިޒްކަމުގެ ސަނަދު ހާސިލްކުރި ފަރާތަކަށް ރައީސުލްޖުމްހޫރިއްޔާ ހާފިޒްކަމުގެ ސަނަދު ހަވާލުކުރައްވަނީ / ފޮޓޯ: އިސްލާމިކް މިނިސްޓްރީ
ރައީސް ވިދާޅުވީ، މިސަރުކާރުގެ ސިޔާސަތަކީ، އަދި އަޒުމަކީވެސް ދިވެހި ލޮބުވެތި ރައްޔިތުންގެ އެހީތެރިކަމާއި މައިންބަފައިންނާއި ޓީޗަރުންނާއި އެންމެން ގުޅިގެން ކުރެވޭ ބުރަ މަސައްކަތްތަކުން މި އަދަދު އެތައް ގުނައަކުން އިތުރުކުރުންކަމަށް ވެސް މިރޭ ރައީސް ވިދާޅުވިއެވެ.
ރައީސްގެ ވާހަކަފުޅުގައި ވަނީ ކޮންމެ މީހަކީވެސް ޤުރްއާނުގައިވާ ގޮތަށް ޢަމަލުތައް ބައްޓަންވެފައިވާ މީހަކުކަމުގައިވުމަށް އިލްތިމާސް ކުރައްވާފައެވެ.
މި ހަފުލާގައި ހަނދާނީ ލިޔުން ދެއްވި ހާފިޒުންނަކީ 2022 ވަނަ އަހަރުގެ ޖުލައި މަހުން ފެށިގެން 2023 ވަނަ އަހަރުގެ އޮކްޓޯބަރު މަހުގެ ނިޔަލަށް ގުރުއާން ހިތުދަސްކޮށް ހާފިޒުކަމުގެ ސަނަދު ހާސިލްކުރެއްވި ފަރާތްތަކެވެ.
މިރޭގެ ރަސްމިއްޔާތުގައި ރައީސް މުއިއްޒުގެ އިތުރުން އެމަނިކުފާނުގެ ދެކަނބަލުންނާއި ސަރުކާރުގެ ވަޒީރުންމާއި އިސް ވެރިން ބައިވެރިވެވަޑައިގެންނެވި/ ފޮޓޯ: އިސްލާމިކް މިނިސްޓްރީ
އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވި ގޮތުގައި މިހާތަނަށް 250 ކުދިންނަށް ހާފިޒުކަމުގެ ސަނަދު ދެވިފައިވެއެވެ. އަދި ސަރުކާރުގެ އަމާޒަކީ ކުރިއަށް އޮތް ފަސް އަހަރު ތެރޭގައި 1،000 ކުދިން ހާފިޒުންނަށް ހެދުން ކަމަށް އޭނާ ވިދާޅުވިއެވެ.
މިނިސްޓަރު ޝަހީމް އިތުރަށް ވިދާޅުވި ގޮތުގައި ހާފިޒުންނަށް ދެއްވި ގައުނަކީ އެ ކުދިންނަށް ހާއްސަކޮށް ފަރުމާކޮށްފައިވާ ގައުނެކެވެ. މި ގައުނާއެކު ތުރުކުރައްވާ ތާކިހާ އުސޫލެއްގެ ތެރެއިން ކުދިންނަށް މިލްކުކުރެވޭނެ ކަމަށާއި، ހާއްސަ ހަފުލާތަކާއި ޖަލްސާތަކުގައި ގުރުއާން ކިޔެވުމާއި ހުތުބާ ދެއްވުމަށް މި ތާކިހާ ބޭނުންކުރެވޭނެ ކަމަށް އޭނާ ވިދާޅުވިއެވެ.
އިސްލާމިކް މިނިސްޓްރީން ބުނި ގޮތުގައި މާލޭ ހުކުރު މިސްކިތުގެ ހިތްގައިމު ޑިޒައިންތައް ހިމެނޭހެން ނުލާއި ރަންކުލައިން ފަރުމާކޮށްފައިވާ މި ގައުނުން ދައްކުވައިދެނީ ރާއްޖޭގެ އިސްލާމީ ތާރީހާއި ސަގާފަތާއި ދިވެހިންގެ މެދުގައިވާ އިސްލާމީ އުހުއްވަތްތެރިކަމެވެ.
