ރާއްޖެ ޓީވީން ގެނެސްދިން ޕްރޮގްރާމެއްގައި އޯޓިސްޓިކް ކުދިންނަށް ޖޯކު ޖެހި މައްސަލައިގައި ފިޔަވަޅު އަޅައިދިނުމަށް އިޖްތިމާއީ އަދި އާއިލީ ތަރައްގީއާ ބެހޭ ވުޒާރާއިން ބްރޯޑްކާސްޓިންގ ކޮމިޝަނަށް ހުށަހަޅައިފިއެވެ.
އެ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ، ރާއްޖެ ޓީވީން 24 މާރިޗު 2025 ވަނަ ދުވަހު ގެނެސްދިން "ކާލާބައިސާ" ނަމަކަށް ކިޔާ ޕްރޮގްރާމެއްގައި ނުކުޅެދުންތެރިކަން ހުންނަ ފަރާތްތަކަށް ނިސްބަތްކޮށް، ޚާއްޞަކޮށް އޯޓިޒަމް އަދި ޑައުން ސިންޑްރޯމް ހުންނަ ފަރާތްތަކާއި ކުޑަކުދިންގެ ކަރާމާތަށް އުނިކަން ލިބޭފަދަ ބަހުރުވައަކުން ވާހަކަދައްކާ އަމަލުކޮށްފައިވާ ކަމަށެވެ.
ވުޒާރާއިން ބުނީ ނުކުޅެދުންތެރިކަން ހުންނަ ފަރާތްތަކަކީ ރާއްޖެ ބައިވެރިވެފައިވާ ބައިނަލްއަޤްވާމީ މުއާހަދާތަކުންނާއި ރާއްޖޭގެ ޤާނޫނުއަސާސީގެ 35 ވަނަ މާއްދާއިން ޚާއްޞަ ރައްކާތެރިކަން ލިބިގެންވާ ފަރާތްތަކެއް ކަމަށެވެ. އަދި ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ 53 ވަނަ މާއްދާގައި ކުޑަކުދިންގެ ޙައްޤުތަކަށް އުނިކަން ލިބޭގޮތަށް ވާހަކަދެއްކުމާއި، އެކުދިންގެ ޙައްޤުތަކަށް އުނިކަން ލިބޭފަދަ ކަންކަމަށް ހިތްވަރު ދިނުމަކީ މަނާކަމެއް ކަމުގައި ބަޔާންކޮށްފައިވާ ކަމަށް ވުޒާރާއިން ބުންޏެވެ.
މި ހާދިސާއަކީ މުޖުތަމަޢުގައި ތިބި ޚާއްޞަ ރައްކައުތެރިކަން ބޭނުންވާ ފަރާތްތާ ފަރާތްތަކަށް އަޅާލުމާއި، އޯގާތެރި މުޖުތަމަޢެއް ބިނާކުރުމަށް ކުރަމުންދާ މަސައްކަތްތަކަށް ހީނަރުކަން ލިބިގެންދާނެކަމެއް ކަމަށް ވުޒާރާއިން ބުންޏެވެ. އަދި މިފަދަ ކަންކަން ތަކުރާރުވެގެން ދިއުމަކީ ނުކުޅެދުންތެރިކަން ހުންނަ ފަރާތްތަކާއި ކުދިންގެ އިންސާނީ ކަރާމާތަށް އުނިކަން ލިބޭފަދަ ވާހަކަތައް ދެއްކުން އާންމުވެގެން ދިއުމުގެ ފުރުޞަތު އޮތްކަމެއް ކަމަށް ވެސް ވުޒާރާއިން ފާހަގަކުރިއެވެ.
އެހެންކަމުން، މި މައްސަލައާއި ގުޅިގެން ޤާނޫނާއި ގަވާއިދާއި އެއްގޮތްވާ ގޮތުގެ މަތިން، ރާއްޖެ ޓީވީއާ މެދު ފިޔަވަޅު އަޅައިދިނުމަށް އެދި ބްރޮޑްކާސްޓިންގ ކޮމިޝަނަށް ހުށަހަޅާފައިވާ ކަމަށް ވުޒާރާއިން ބުންޏެވެ.
ދިވެހި މުޖުތަމަޢުގައި ތިބި ޚާއްޞަ ރައްކައުތެރިކަމާއި އަޅާލުމާއި ލޯބި ލިބެންޖެހޭ އެންމެހާ ފަރާތްތަކުގެ އިންސާނީ ކަރާމާތާއި ޙައްޤުތައް ކަށަވަރު ކުރެވޭނެ ފަދަ ގޮތްތަކަށް މުޖުތަމަޢުގެ ހުރިހާ ކަމެއް ރޭވުމަށް ވުޒާރާއިން ވަނީ އިލްތިމާސްކޮށްފައިއެވެ
