ނ. ވެލިދޫގައި އަންނަ މަހު ޑަޔަލިސިސްގެ ޚިދުމަތް ފެށުމަށް ހަމަޖެހިފައިވާ ކަމަށް ހެލްތު މިނިސްޓަރ އަބްދުﷲ ނާޒިމް އިބްރާހިމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ އެމްއެމްޓީވީއަށް ދެއްވި ޚާއްޞަ އިންޓަވިއުއެއްގައެވެ.
ކިޑްނީ ބައްޔަށް ފަރުވާ ހޯދަމުންދާ ފަރާތްތަކަށް ލުޔެއް ހޯދައިދިނުމުގެ ގޮތުން، ރާއްޖޭގެ ހުރިހާ އަތޮޅެއްގައި ޑަޔަލިސިސްގެ ޚިދުމަތް ފޯރުކޮށްދިނުމަށް ސަރުކާރުން މަސައްކަތްކުރަމުންދާ ކަމަށް މިނިސްޓަރ ފާހަގަކުރެއްވިއެވެ. މިގޮތުން ބައެއް އަތޮޅު ހޮސްޕިޓަލްތަކާއި ޞިއްޙީ މަރުކަޒުތަކުގައި މި ޚިދުމަތް ފެށުމަށް ރޭވިފައިވާ ކަމަށްވެސް ވަޒީރު ވިދާޅުވިއެވެ.
ކިޑްނީގެ ބަލިތަކަށް ފަރުވާ ހޯދަމުންދާ ގިނަ ބަޔަކު ގަވާއިދުން ޑަޔަލިސިސްގެ ޚިދުމަތް ހޯދަންޖެހެއެވެ. ބައެއް ފަރާތްތަކުން ކޮންމެ ދުވަހަކު މި ޚިދުމަތް ހޯދަންޖެހެއެވެ. ރަށުން މި ޚިދުމަތް ނުލިބޭނަމަ، އެންމެ ކައިރި ރަށަކަށް ގޮސްގެން މި ފަރުވާ ހޯދުމަށް ރައްޔިތުން ކުރަންޖެހޭ ޚަރަދު ކުޑަކުރުމަކީ ސަރުކާރުގެ އަމާޒެއް ކަމަށް މިނިސްޓަރ ނާޒިމް ވިދާޅުވިއެވެ.
ރާއްޖޭގެ އެކި ކަންކޮޅުތަކުގައި ޑަޔަލިސިސްގެ ޚިދުމަތް ފުޅާކުރުމަކީ ސަރުކާރުން އިސްކަންދޭ ކަމެއްގެ ގޮތުގައި ހެލްތު މިނިސްޓަރ ފާހަގަކުރެއްވިއެވެ. މި މަސައްކަތުގެ ތެރެއިން، އިހަވަންދޫގައި މިދިޔަ މަހުވަނީ ޑަޔަލިސިސްގެ ޚިދުމަތް ފަށާފައެވެ.
