ދިވެހިރާއްޖޭގައި ޝީޝާ މަނާކުރުމާއި، ހަކުރަށް ދެމުންދާ ސަބްސިޑީ ކަނޑާލައި ހަކުރު އެކުލެވޭ ބާވަތްތަކުން ޓެކްސް ނެގުމާ ގުޅޭގޮތުން ސަރުކާރުން މަޝްވަރާ ކުރަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
މިނިސްޓަރު ނާޒިމް ވިދާޅުވީ ޝީޝާ ފަދަ ދުންފަތުގެ ބާވަތްތައް މަނާކުރުމާއި ހަކުރު އެކުލެވޭ ބާވަތްތަކުން ޓެކްސް ނެގުމަކީ އާންމުންގެ ދިރިއުޅުމުގެ ވައްޓަފާޅިއާ ވަރަށް ބޮޑަށް ގުޅިފައިވާ ކަންކަން ކަމަށެވެ. އެހެންކަމުން، އެ ކަންތައްތައް ވަކި އުސޫލެއްގެ ތެރެއިން ރެގިއުލޭޓް ކުރުމުގެ މަސައްކަތް މިހާރު ކުރިއަށްދާ ކަމަށް އޭނާ ފާހަގަކުރެއްވިއެވެ.
އާންމު ސިއްހަތު ރައްކާތެރިކުރުމަށް ސަރުކާރުން އަޅަމުންދާ ފިޔަވަޅުތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، ދާދިފަހުން ވޭޕްގެ ބާވަތްތައް މަނާކުރުމާއި 2007 ވަނަ އަހަރުން ފެށިގެން އުފަންވާ ކުދިންނަށް ދުންފަތުގެ ބާވަތްތައް މަނާކުރުމަށް ނިންމާފައިވާ ނިންމުމަކީ މި މަސައްކަތުގެ މުހިންމު ފިޔަވަޅުތަކެއް ކަމަށެވެ. ޕަބްލިކް ހެލްތު ވިސްނުމަކުން ހަރުފަތަކަށް ފަހު ހަރުފަތެއް ގިރާކުރަމުންދާ ނަމަ، ހަކުރުގެ މައްސަލައަށް ވެސް ހައްލު އަންނާނެ ކަމަށް ގަބޫލުކުރައްވާ ކަމަށް މިނިސްޓަރު ވިދާޅުވިއެވެ.
"އަޅުގަނޑުމެން އެކި ލެވެލްގައި އެބަ ކުރެވޭ މަޝްވަރާ. ކިހާ ހިސާބެއްގައި ތޯ މުޅިން ތަންފީޒުވެގެން ދާނީ، އެއީ ކަންނޭނގެ އުފެދޭނެ ސުވާލަކީ. އެންމެ މުހިއްމު ދަނޑިވަޅުގައި، މުހިއްމު ހާލަތުގައި، މުހިއްމު ވަގުތުގައި އެކަންކުރުން ވަރަށް މުހިއްމު،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ފާހަގަކުރެއްވި ގޮތުގައި މިފަދަ ނިންމުންތަކަކީ ހަމައެކަނި ހެލްތު މިނިސްޓްރީއަށް އެކަނި ނިންމޭނެ ކަންކަމެއް ނޫނެވެ. ނަމަވެސް، މި ފިޔަވަޅުތައް އެޅޭނެ ދުވަހަކަށް މުޅި ހެލްތު ސެކްޓާ އިން އިންތިޒާރު ކުރަމުންދާ ކަމަށާއި، މިއަހަރުގެ ތެރޭގައި ސަރުކާރުން އެންމެ ބޮޑު އިސްކަމެއް ދޭނީ މިކަންކަމަށް އާންމުން ހޭލުންތެރި ކުރުވުމަށް ކަމަށްވެސް މިނިސްޓަރު ވިދާޅުވިއެވެ.
