މި ހިނގާ މާޗު މަސް ނިމުމުގެ ކުރިން ރާއްޖޭގެ އެކި ރަށްރަށަށް ބޭނުންވާ އިތުރު 34 އެމްބިއުލާންސެއް ހަވާލުކުރައްވާނެ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރު ނާޒިމް ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން ސިއްހީ ނިޒާމު އިތުރު ހަރުފަތަކަށް ގެންދިއުމަށްޓަކައި ރާއްޖޭގެ އެކި ކަންކޮޅުތަކުގައި ގާތްގަނޑަކަށް 170 އިންފްރާސްޓްރަކްޗާ މަޝްރޫއު ކުރިއަށްދާ ކަމަށެވެ.
މިނިސްޓަރު ފާހަގަކުރެއްވި ގޮތުގައި، މި ސަރުކާރުން ވެރިކަމާ ހަވާލުވިއިރު ސިއްހީ ދާއިރާ އޮތީ ވަރަށް ބޮޑަށް އިހުމާލުވެފަ އެވެ. އެގޮތުން ވަރަށް ގިނަ ހެލްތު ސެންޓަރުތައް މަރާމާތަށް ބޭނުންވެފައި ހުރިއިރު، ބަލިމީހުން ބާއްވާ އެދުތަކާއި ބޭނުންކުރާ އިކުއިޕްމަންޓުތައް ވެސް ހުރީ އަޅާނުލުމުގެ ސަބަބުން ހަލާކުވެ ވީރާނާވެފަ އެވެ. އަދި ހާއްސަކޮށް ރަށްރަށުގައި ބޭނުންކުރާ އެމްބިއުލާންސްތައް ހަލާކުވެ، ހިދުމަތް ދިނުމަށް ބޮޑެތި ހުރަސްތަކެއް ކުރިމަތިވެފައިވާކަން މިނިސްޓަރު ފާހަގަކުރެއްވި އެވެ.
ދިވެހި ރައްޔިތުންނަށް ދެމެހެއްޓެނިވި ގޮތެއްގައި އެމްބިއުލާންސްގެ ހިދުމަތް ފޯރުކޮށްދިނުމަށް ސަރުކާރުން ފެށި މަޝްރޫއުގެ ދަށުން، މިދިޔަ ފެބުރުވަރީ މަހު އެކަނިވެސް 56 އެމްބިއުލާންސް ރަށްރަށަށް ވަނީ ފޯރުކޮށްދީފަ އެވެ. މީގެ އިތުރުން، ކުރިއަށް އޮތް ހަފްތާގައި 14 އެމްބިއުލާންސް އަދި މި މަހުގެ ފަހުކޮޅު އިތުރު 17 ރަށަކަށް އެމްބިއުލާންސް ފޮނުވުމަށް ވަނީ ހަމަޖެހިފައިވާ ކަމަށް މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ، އަންނަ އޭޕްރީލް މަހުގެ ތެރޭގައި ސިޓީތަކަށް އަމާޒުކޮށްގެން ގެންނަ "ޕެރެމެޑިކް" އެމްބިއުލާންސްތައް ލިބޭނެ ކަމަށެވެ. މިއީ ތަންކޮޅެއް ކުދި ރަށްތަކަށްވުރެ ބޮޑެތި ރަށްރަށުގައި ބޭނުންކުރުމަށް ހާއްސަކޮށްގެން ގެންނަ ބޮޑެތި އެމްބިއުލާންސްތަކެކެވެ.
"ޒަމާނުއްސުރެ އަޅުގަނޑުމެންނަށް ދިމާވެފައި ހުރި ހެލްތު ސެކްޓާގެ ގޮންޖެހުންތަކުން އަރައިގަތުމަށްޓަކައި ހެލްތު ސެކްޓާގެ އިންފްރާސްޓްރަކްޗާ އާއި ވަސީލަތްތައް ހަމަކުރުމާއި، އަދި ހާއްސަކޮށް އެމްބިއުލާންސްގެ ކަންތަކުގައި މި ސަރުކާރުން ސިޔާސަތުތައް އެކުލަވާލައި ބަޖެޓު އެއަށް ދެއްވައި އެކަންތައް ތަންފީޒުކުރައްވަމުން ގެންދަވާ މަންޒަރު މިހާރު ތި ފެންނަނީ،" މިނިސްޓަރު ނާޒިމް ވިދާޅުވި އެވެ.
މި މަސައްކަތްތަކާއެކު ރަށްރަށުގެ ސިއްހީ މަރުކަޒުތަކަށް ދިމާވެފައިވާ ވަސީލަތްތަކުގެ ދަތިކަމަށް ބޮޑު ހައްލެއް ލިބިގެންދާނެ އެވެ.
