ނ. ވެލިދޫގެ އިގްތިސާދީ ކުރިއެރުމަށްޓަކައި އެރަށުގައި ކުރިއަށްގެންދާ އިންޑަސްޓްރިއަލް ޒޯން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ 96 އިންސައްތަ މަސައްކަތް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފި އެވެ.

މި މަޝްރޫއުގެ ތަފްސީލު ހާމަކުރައްވަމުން އެމްޓީސީސީން ބުނީ، މިހާރު ކުރިއަށްދަނީ 208 ޖިއޯބޭގަށް ވެލިއަޅައި ފެހުމުގެ މަސައްކަތާއި، 37 މީޓަރުގެ ސަރަހައްދެއްގައި ރިވެޓްމަންޓް ޖެހުމުގެ މަސައްކަތް ކަމަށެވެ. މަސައްކަތްތައް ބާރު ސްޕީޑުގައި ކުރިއަށްދާތީ، މާލަސްތަކެއްނުވެ މުޅި މަޝްރޫއު އެއްކޮށް ނިންމާލެވޭނެ ކަމަށް އެ ކުންފުނިން ލަފާކުރެ އެވެ.

ވެލިދޫ ހުޅަނގު ފަރާތުން 2.7 ހެކްޓަރުގެ ބިން ހިއްކުމަށް ހަމަޖެހިފައިވާ މި މަޝްރޫއަކީ އޮޑިދޯނިފަހަރު ބަނުމާއި، ބާލާ އެހެލުމުގެ އިތުރުން ފައިބަރު މަސައްކަތް ކުރުމަށް ހާއްސަކޮށްގެން ހިންގާ މަޝްރޫއެކެވެ. މި މަޝްރޫއުގެ ދަށުން 443 މީޓަރުގެ ޖިއޯބޭގް ރިވެޓްމަންޓް ޖެހުމަށް ވެސް ވަނީ ކަނޑައަޅާފަ އެވެ.

ވެލިދުއަކީ ސަފާރީއާއި ބޮޑެތި އުޅަނދުފަހަރު ބަނުމަށް ރާއްޖޭގައި މަޝްހޫރު ރަށަކަށް ވީނަމަވެސް، ރަށުގެ ބިން ފުރިފައިވުމުގެ ސަބަބުން މިފަދަ މަސައްކަތްތައް ކުރުމުގައި ގިނަ ގޮންޖެހުންތަކެއް ކުރިމަތިވެފައިވެ އެވެ. މި އިންޑަސްޓްރިއަލް ޒޯން ތަރައްގީވެގެން ދިއުމަކީ ރަށުގެ އިގްތިސާދަށް ބޮޑު ދިރުމެއް ލިބި، އޮޑިވެރިންނަށާއި ފައިބަރު މަސައްކަތް ކުރާ ފަރާތްތަކަށް ލިބިގެންދާނެ ބޮޑު ލުޔެއް ކަމަށް ރަށުގެ ރައްޔިތުން ދެކެ އެވެ.

ޖުމްލަ 33.6 މިލިއަން ރުފިޔާ ހަރަދުކޮށްގެން ސަރުކާރުން ކުރިއަށްގެންދާ މި މަޝްރޫއަކީ ވެލިދޫގެ އިގްތިސާދީ ހަރަކާތްތައް ފުޅާކޮށް، ރަށުގައި ތިބެގެން ވިޔަފާރި ކުރުމުގެ ފުރުސަތު ފަހިކޮށްދިނުމަށް ކުރިއަށްގެންދާ މުހިންމު މަސައްކަތެކެވެ.