ސަރުކާރުން އަލަށް އުފެއްދި ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑުން ބޭސް އެތެރެކުރަން ފަށައި، އެ ބޭސްތައް ރަށްރަށަށް ފޮނޮވުމުގެ މަސައްކަތް މިހާރު ފަށާފައިވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން މިނިސްޓަރު ނާޒިމް އިއްޔެ ވިދާޅުވީ، ބޭސް އެތެރެކުރުމަށް ވަކި ހާއްސަ ކުންފުންޏެއް އުފެއްދުމުގެ ސަބަބުން މުޅި ނިޒާމުގައި ހުރި މައްސަލަތައް ދެނެގަނެވި، އެކަންކަން ހައްލުކުރުމަށް މަސައްކަތް ކުރާނެ ހާއްސަ ބަޔަކު މިހާރު ތިބި ކަމަށެވެ.
"މިހާރު އެ ކުންފުނީގެ މަސައްކަތް ފެށިގެން އެބަ ކުރިއަށްދޭ. ބޭސް އެތެރެކުރުމުގެ މަސައްކަތް ފަށައިފި. މިހާރު ބައެއް ބޭސްތައް ކުންފުނިން އެތެރެކޮށްގެން ސަޕްލައިކުރަން ފަށައިފި ރަށްރަށަށް،" މިނިސްޓަރު ވިދާޅުވިއެވެ.
ޑޮކްޓަރީ ބޭހާއި މެޑިކަލް ކޮންޒިއުމަބަލްސްގެ އިތުރުން މެޑިކަލް އިކުއިޕްމަންޓް ގަނޑުކޮށް ގެނައުމަށް މި ކުންފުނި އުފައްދާފައިވަނީ މިދިޔަ އަހަރުގެ ސެޕްޓެމްބަރު މަހުގެ ނުވަވަނަ ދުވަހުއެވެ. މި ކުންފުނީގެ ޗެއާމަންގެ މަގާމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް އައްޔަންކުރައްވާފައިވާއިރު، މެނޭޖިން ޑިރެކްޓަރަކީ ޑރ. ޝާހު މާހިރެވެ.
މި އާ ބަދަލާއެކު، ސްޓޭޓް ޓްރޭޑިން އޯގަނިޒޭޝަން (އެސްޓީއޯ) އިން ހިންގަމުން އައި 196 ފާމަސީއަކާއި، އެ ތަންތަނުގައި މަސައްކަތްކުރާ 600 އެއްހާ މުވައްޒަފުން ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަނަށް ވަނީ ބަދަލުކޮށްފައެވެ.
އެސްޓީއޯއިން ރާއްޖޭގައި ފާމަސީގެ ހިދުމަތް ދޭން ފެށީ 1984 ވަނަ އަހަރުއެވެ. އަދި ރާއްޖޭގެ މީހުން ދިރިއުޅޭ ހުރިހާ ރަށެއްގައި އެސްޓީއޯއިން ބޭސް ފިހާރަ ހިންގާތާ މިހާރު ވަނީ 10 ވަރަކަށް އަހަރުވެފައެވެ. ނަމަވެސް ސަރުކާރުގެ އައު ސިޔާސަތުގެ ދަށުން މި ހިދުމަތްތައް ދެން ކުރިއަށްދާނީ އަލަށް އުފެއްދި ކުންފުނީގެ ދަށުންނެވެ.
