ރައީސް ޑރ. މުޙައްމަދު މުޢިއްޒުގެ ސަރުކާރުން ދެއްވަދޫ އައިސްޕްލާންޓް އަލުން އޮޕަރޭޝަނަށް ގެނެސްފިއެވެ. މިއީ ކުރީގެ ސަރުކާރުގެ ދެ އަހަރަށްވުރެ ގިނަ ދުވަހު ވީރާނާވާން ދޫކޮށްލާފައި އޮތް އައިސްޕްލާންޓެކެވެ.
ރައީސް މުޢިއްޒު މިއަހަރުގެ ޖަނަވަރީ 9 ވަނަ ދުވަހު ދެއްވަދޫއަށް ކުރެއްވި ދަތުރުފުޅުގައި، އެމަނިކުފާނުގެ އަރިހުން ދެއްވަދޫ މަސްވެރިން އެދުނީ އައިސްޕްލާންޓް އޮޕަރޭޝަނަށް ގެނެސްދެއްވުމަށެވެ. ރައީސް އޭރު ވަޢުދުވެވަޑައިގަތީ ތިން މަސް ތެރޭ އެކަން ކޮށްދެއްވާނެ ކަމަށެވެ. އެ ވަޢުދު ފުއްދުމުގެ ގޮތުން، މިހާރު ވަނީ އައިސްޕްލާންޓް އޮޕަރޭޝަނަށް ގެނެސްފައެވެ.
ދެއްވަދޫ މަސްވެރިއަކު ބުނި ގޮތުގައި ކުރީގެ އެމްޑީޕީ ސަރުކާރުން ފަރުވާ ކުޑަކޮށްލައި ދޫކޮށްލާފައިވާ އައިސްޕްލާންޓް އޮޕަރޭޝަނަށް ނުގެނެވި، ފެނަކައާއި ހަވާލުކޮށްފައި އޮތުމަށްފަހު އެފަހަރުގެ ރިޔާސީ އިންތިޚަބާއި ދިމާކޮށް އެމްޑީޕީ ސަރުކާރުން އައިސްޕްލާންޓަށް ބޭކާރު ގޮތުގައި ގިނަޢަދަދެއްގެ ވަޒީފާތައް ވެސް އުފެއްދިއެވެ. ނަމަވެސް ސަރަޙައްދުގެ ގިނަ މަސްވެރިން ޚިދުމަތް ހޯދާ އެ އައިސްޕްލާންޓް މަރާމާތު ކުރުމަށް ކުރީ ސަރުކާރުން އެއްވެސް މަސައްކަތެއް ކޮށްފައި ނުވާކަން އެރަށުން ފާހަގަކުރިއެވެ.
Advertisement
”އެހެން ދަބަރަށް ވާން ދޫކޮށްލާފައި ބޭއްވުމަކީ ވަރަށް ބޮޑު ބޭއިންސާފެއް. އެމްޑީޕީ ސަރުކާރުން ދެއްވަދޫ އެކަންޏެއްނޫން، މުޅި ސަރަޙައްދުގެ މަސްވެރިންނަށް ބޭނުންހިފޭ މި އައިސްޕްލާންޓާއި މެދުގައި ފަރުވާ ކުޑަކޮށްލީ. އެހެންކަމުން ރައީސް ޑރ. މުޢިއްޒު އަށް ވެރިކަން ލިބިވަޑައިގެން އެމަނިކުފާނު މިރަށަށް ވަޑައިގަތް ދުވަހު އަޅުގަނޑުމެން އެދުނީ މިކަން ރަނގަޅުކޮށްދޭން. އެމަނިކުފާނު ވަޢުދުވިތާ ތިންމަސް ނުވޭ. މިހާރު އެހެރީ ހައްލު ކޮށްފައި" ދެއްވަދޫ މަސްވެރިއަކު ވިދާޅުވިއެވެ.
ރައީސް މުޢިއްޒުގެ ސަރުކާރުން ވަޢުދުތައް ފުއްދުމަށް ކުރަމުންދާ މަސައްކަތްތަކުގެ ތެރެއިން މިހާތަނަށް އެމަނިކުފާނު ވެވަޑައިގެންނެވި ވަޢުދުއް ފުއްދަވަމުންދާއިރު، އޭގެ އިތުރުންވެސް ރައްޔިތުންގެ އުންމީދުތައް ހަގީގަތަކަށް ހެއްދެވުމަށް ދަނީ ގިނަ މަސައްކަތްތަކެއް ކުރައްވަމުންނެވެ.
