މެޑިސިން ކިޔަވާ ދިވެހި ދަރިވަރުންނަށް ބަންގްލަދޭޝްގެ އިތުރު ފަސް ކޮލެޖަކުން އިންޓާންޝިޕް ހެދޭނެ ގޮތް ދިވެހި ސަރުކާރު މެދުވެރިވެ ހަމަޖައްސައިދީފިއެވެ.

ހެލްތު މިނިސްޓްރީން ބުނީ ބަންގްލަދޭޝްގައި މެޑިސިން ކިޔަވާ ދިވެހި ދަރިވަރުންނަށް އިންޓާންޝިޕް ހެދުމަށް ހުރި ދަތިތަކަށް ބޮޑު ހައްލެއް ލިބިފައިވާ ކަަމަށެވެ.

މީގެ ކުރިން ދިވެހި ދަރިވަރުންނަށް ބަންގްލަދޭޝް އިން އެމްބީބީއެސް އިންޓާޝިޕް ފުރުޞަތު ލިބެނީ ހަމައެކަނި ޗިޓަގޮންގް މެޑިކަލް ކޮލެޖް ހޮސްޕިޓަލުން ނުވަތަ ޝޭރް-އޭ-ބަންގްލާ މެޑިކަލް ކޮލެޖް ހޮސްޕިޓަލުން ކަމަށް މިނިސްޓްރީން ބުންޏެވެ.

ހެލްތު މިނިސްޓްރީ އާއި ފޮރިން މިނިސްޓްރީ ގުޅިގެން ކުރި މަސައްކަތުން ބަންގްލަދޭޝްގައި އެމްބީބީއެސް އިންޓާންޝިޕް ފުރުޞަތުތައް ހޯދުމަށް ކުރެވުނު މަސައްކަތުގެ ނަތީޖާއެއްގެ ގޮތުން، އިތުރު ފަސް ކޮލެޖެއްގައި ދިވެހި ދަރިވަރުންނަށް އިންޓާންޝިޕް ފުރިހަމަކުރުމުގެ ފުރުޞަތު މިހާރު ލިބޭނެ އިންތިޒާމު ހަމަޖެހިފައިވާ ކަމަށް ހެލްތު މިނިސްޓްރީން ބުންޏެވެ.

އެއީ، ސިލެޓު އެމްއޭޖީ އޮސްމާނީ މެޑިކަލް ކޮލެޖު، މައިމެންސިންހު މެޑިކަލް ކޮލެޖު، ރަޖްޝާނީ މެޑިކަލް ކޮލެޖު، ޝަހީދު ޒިއައުރު ރަހުމާން މެޑިކަލް ކޮލެޖު، ބޮގުރާ އަދި ކޮކްސަސް ބާޒާރު މެޑިކަލް ކޮލެޖެވެ.

މިނިސްޓްރީން ބުނި ގޮތުގައި، މި ފަސް ކޮލެޖަކީ ވެސް ބަންގްލަދޭޝް މެޑިކަލް އެންޑް ޑެންޓަލް ކައުންސިލް އަދި މޯލްޑިވްސް މެޑިކަލް އެންޑް ޑެންޓަލް ކައުންސިލުން ގަބޫލުކުރާ ކޮލެޖްތަކެވެ.

ބަންގްލަދޭޝް އިން އިންޓާޝިޕް ޕްލޭސްމަންޓް ހޯދަން ބޭނުންވާ ދަރިވަރުން މިނިސްޓްރީގެ training@health.gov.mv އީމެއިލް ރިކުއެސްޓް ފޮނުވުމަށް ވަނީ އެދިފައެވެ.

މިނިސްޓްރީން ބުނީ އިންޓާޝިޕް ފުރުޞަތު ރާއްޖެއިން ވެސް އިތުރަށް ފުޅާކުރުމުގެ މަސައްކަތް ކުރެވޭ ކަމަށާއި މި އަހަރު އިތުރު ސަރުކާރު ހޮސްޕިޓަލްތަކުގައި އިންޓާޝިޕް ފެށުމަށް މިނިސްޓްރީން މަސައްކަތް ކުރަމުން އަންނަ ކަމަށެވެ.