ތެލެސީމިއާ ސެންޓަރުން ޚިދުމަތް ދޭ ގަޑިތައް ހޮސްޕިޓަލަކާ އެއް ހަމައަކަށް އިތުރު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މި ނިންމެވުމަކީ ތެލެސީމިއާ ސެންޓަރުގެ ޚިދުމަތާމެދު ހިތްހަމަނުޖެހިގެން ބައެއް ފަރާތްތަކުން ކުރި މުޒާހަރާއަކަށްފަހު އަޅުއްވާފައިވާ ފިޔަވަޅެކެވެ.

މުޒާހަރާ ކުރިތާ 24 ގަޑިއިރު ނުވަނީސް، ރައީސް ވަނީ މާލޭގައި ހުންނަ ތެލެސީމިއާ ސެންޓަރަށާއި ހުޅުމާލޭގައި ތަރައްޤީ ކުރަމުންދާ އައު ސެންޓަރަށް ޒިޔާރަތްކުރައްވާފައެވެ. މި ޒިޔާރަތުގައި އެމަނިކުފާނު ވަނީ ސެންޓަރުތަކުގެ މަސައްކަތްތަކާއި ކުދިންގެ ޙާލަތު ގާތުން ބައްލަވައި، ޝަކުވާތައް އަޑުއައްސަވާފައެވެ.

ރައީސްގެ މި ޒިޔާރަތަށްފަހު އަޅުއްވަން ނިންމަވާފައިވާ ފިޔަވަޅުތަކުގެ ތެރޭގައި:

1. ތެލެސީމިއާ ސެންޓަރުން ޚިދުމަތް ދޭ ގަޑިތައް ހޮސްޕިޓަލަކާ އެއް ހަމައަކަށް އިތުރުކުރުން.
2. ތެލެސީމިއާ ސެންޓަރަށް ޑިރެކްޓަރ ޖެނެރަލްއެއް ޢައްޔަންކުރުން.
3. ޚިދުމަތް ރަނގަޅު ކުރުމަށް އިންޓަރނަލް މެނޭޖްމަންޓަށް ގެންނަން ޖެހޭ ބަދަލުތައް ގެނައުން.
4. މިހާރު ދިމާވެފައިވާ ފިލްޓަރުގެ މައްސަލަތައް ޙައްލު ކުރުމަށް އަވަސް ފިޔަވަޅު އެޅުން.
5. ބަލި މީހުންނަށް ޚިދުމަތް ދިނުމަށް ފިޒިޝަނުން (ޑޮކްޓަރުން) ހަމަޖެއްސުން.
6. ތެލެސީމިއާ ސެންޓަރު ބާވެ ހަލާކުވެފައިވާތީ އާ ޢިމާރާތަކަށް ޚިދުމަތް ބަދަލު ކުރުމުގެ މަސައްކަތް ކުރުން.

މި ބަދަލުތަކާއެކު، ތެލެސީމިއާ ސެންޓަރުން ޚިދުމަތް ދޭ ގަޑިތައް އިތުރުވެ، ބަންދު ދުވަސްތަކުގައިވެސް ޚިދުމަތް ލިބެން ހުންނާނެއެވެ.

ރައީސް ވިދާޅުވީ ތެލެސީމިއާ ކުދިންނަށް ދިމާވާ ދަތިތައް ސީދާ އެމަނިކުފާނުގެ ބެލުމުގެ ދަށުން ޙައްލުކުރުމަށް ނިންމަވާފައިވާ ކަމަށެވެ. މިއީ ޒަމާނުއްސުރެ ތެލެސީމިއާ ސެންޓަރުގައި ހުރި ގިނަ މައްސަލަތައް ޙައްލުކުރުމަށް އެޅޭ މުހިންމު ފިޔަވަޅެއް ކަމުގައި ފާހަގަކުރެވެއެވެ.