ހުޅުމާލެ ދެވަނަ ފިޔަވަހީގައި އިމާރާތްކުރަމުންދާ އައު ސްކޫލުގައި އަންނަ އަހަރުގެ ދިރާސީ އަހަރު ފެށުމާއެކު ކިޔަވައިދޭން ފަށާނެކަމަށް ތަޢުލީމީ ވުޒާރާއިން އިއްޔެ ހާމަކޮށްފިއެވެ.
ތަޢުލީމީ ވުޒާރާއިން މަޢުލޫމާތު ދިންގޮތުގައި، މި ސްކޫލުގެ އިމާރާތުގެ މަސައްކަތް މިއަހަރުގެ ނިޔަލަށް ނިންމާލެވޭނެއެވެ. އަދި 2026 ވަނަ އަހަރުގެ ޖަނަވަރީ މަހު ފެށޭ އައު ދިރާސީ އަހަރާއެކު މި ސްކޫލުގައި ކިޔަވައިދޭން ފެށޭނެއެވެ.
ހުޅުމާލޭގެ ސްކޫލުތަކަށް ދިމާވެފައިވާ ޖާގައިގެ ދަތިކަން ޙައްލުކުރުމުގެ ގޮތުން މި އިތުރު ސްކޫލް އެޅުމަށް ބިންގާ އަޅާފައިވަނީ 2023 ވަނަ އަހަރުގެ ޑިސެމްބަރު މަހުގެ ތެރޭގައެވެ. މިއީ ގްރޭޑް 1 އިން ފެށިގެން ގްރޭޑް 10 އާ ހަމައަށް ކިޔަވައިދޭނެ ސްކޫލެކެވެ.
Advertisement
ތަޢުލީމީ ވުޒާރާއިން އިތުރަށް ހާމަކުރިގޮތުގައި، މި ސްކޫލުގައި 54 ކްލާސްރޫމާއި، ހޯލަކާއި، އެހެނިހެން ވަސީލަތްތަކުގެ އިތުރުން ކުޅިވަރު ކުޅެވޭނެ ޓާފް ދަނޑެއް ހިމެނޭނެއެވެ. އަދި މިއީ ގާތްގަނޑަކަށް 1,700 ދަރިވަރުންނަށް ޖާގަ ލިބޭނެ، އެއްދަންފަޅިއަށް ކިޔަވައިދިނުމަށް ހަމަޖެހިފައިވާ ސްކޫލެކެވެ.
