އަންނަ ޖީލުތަކަށް އަމާން މާދަމާއެއް ހޯދައިދިނުމަށް އެންމެން ގުޅިގެން މަސައްކަތްކުރުމަށް ދުނިޔޭގެ މޫސުމާބެހޭ ދުވަހާ ގުޅިގެން ރައީސް މުޙައްމަދު މުޢިއްޒު ގޮވާލައްވައިފިއެވެ.

ސޯޝަލް މީޑިއާގައި ރައީސް ވިދާޅުވި ގޮތުގައި، ދުރާލާ މޫސުމީ އިންޒާރުދޭ ނިޒާމުތައް ޤާއިމްކުރުމުގެ މަސައްކަތް ދަނީ ކުރަމުންނެވެ. އެގޮތުން މޫސުމާބެހޭ ޒަމާނީ އާލާތްތަކަށް އިންވެސްޓްކޮށްގެން، ކޮންމެ ރަށެއްގައި ދިރިއުޅޭ ކޮންމެ ރައްޔިތަކަށްވެސް މޫސުމީ ބަދަލުތަކަށް ވިލުންތެރިވުމުގެ ގޮތުން ދުރާލާ އިންޒާރުދޭ ނިޒާމެއްގެ ޚިދުމަތް ލިބޭކަން ކަށަވަރުކުރުމަށް މަސައްކަތް ކުރަމުން އަންނަ ކަމަށް ރައީސުލްޖުމްހޫރިއްޔާ ވިދާޅުވިއެވެ.

ކޮންމެ އަހަރެއްގެ މާރޗް 23 ވަނަ ދުވަހު ދުނިޔޭގެ މޫސުމާބެހޭ ދުވަސް ފާހަގަކުރާއިރު، މި ދުވަހުގެ މަޤްޞަދަކީ މޫސުމާ ބެހޭ ގޮތުން ހޭލުންތެރިކަން އިތުރުކޮށް، މޫސުމަށް އަންނަ ބަދަލުތަކާއި ކުރިމަތިލުމަށް ކުރެވޭ މަސައްކަތްތައް ފާހަގަކުރުމެވެ.