ހދ. އަތޮޅާއި ތ. އަތޮޅުގައި އިތުރު ރިސޯޓްތައް ތަރައްޤީކުރުމަށް އަންނަ މަހު ހުޅުވާލާނެ ކަމަށް ފަތުރުވެރިކަމާއި ތިމާވެށްޓާއި ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.
ވަޒީރު ވިދާޅުވި ގޮތުގައި، ރާއްޖޭގެ ފަތުރުވެރިކަމަށް 53 އަހަރު ފާއިތުވެފައިވާއިރު، ފަތުރުވެރިކަން ރާއްޖޭގެ ހުރިހާ އަތޮޅުތަކަށް އެންމެ އެދެވޭ މިންވަރަށް ފުޅާވެފައި ނުވާތީ، މިކަމަށް ހައްލުތަކެއް ހޯދުމަށް ސަރުކާރުން ދަނީ މަސައްކަތް ކުރަމުންނެވެ. އެގޮތުން ކޮންމެ އަތޮޅަކަށް ވަކިން މާސްޓަރ ޕްލޭން ހަދައި، އެ އަތޮޅެއްގައި ފަތުރުވެރިކަން ތަރައްޤީކުރުމަށް މާކެޓިންގ ޕްލޭނެއްވެސް އެކުލަވާލުމުގެ މަސައްކަތް ކުރިއަށްދާ ކަމަށް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވި ގޮތުގައި، އިންވެސްޓްމަންޓްތަކަށް ފަހި މާހައުލެއް އަތޮޅުތަކުގެ ތެރެއިން ހުޅުވިގެން ދިޔުމަކީ އިތުރު އިންވެސްޓަރުން އަންނާނެ ކަމެކެވެ. އަދި މި އަތޮޅުތަކުގައި އިތުރު ރިސޯޓްތައް ހެދިގެން ދިޔުމަކީ ފަތުރުވެރިކަމުގެ ފުރުސަތުތައް ފަހިވެ، އިޤްތިޞާދީ ހަރަކާތްތައް އިތުރުވުމާއެކު ރައްޔިތުންނަށް ލިބޭ މަންފާ އިތުރުވެގެންދާނެ ކަމެއް ކަމަށް ވެސް ވަޒީރު ފާހަގަކުރެއްވިއެވެ.
މީގެއިތުރުން، ޓޫރިޒަމްގެ ޤާނޫނަށް އަލަށް ގެނެވުނު އިޞްލާޙު ވެގެންދާނީ ޓޫރިޒަމް ދާއިރާ ކުރިއަށް އޮތްތަނުގައި ފުޅާވެ، ރާއްޖެ އަންނަ ފަތުރުވެރިން އިތުރުކުރުމަށް އެޅޭ އިތުރު ބާރަކަށް ކަމަށް ވަޒީރު ޠާރިޤް އިބްރާހީމް ވިދާޅުވިއެވެ.
