ވެލާނާ އެއާޕޯޓުގެ 23 ފްލައިޓެއް މިއަދު ކެންސަލް ކޮށްފި އެވެ.

މިއަދު ކެންސަލްކުރި ފްލައިޓްތަކުގެ ތެރޭގައި މެދުއިރުމަތިން ރާއްޖެއަށް ދަތުރުކުރާ މަޝްހޫރު އެއާލައިންތައް ކަމަށްވާ އެމިރޭޓްސް، ފްލައި ދުބާއީ، ގަލްފް އެއާ، އެއާ އަރަބިއާ، އެތިހާދު އަދި ގަތަރު އެއާވޭސްގެ ފްލައިޓްތައް ހިމެނެ އެވެ.

މެދުއިރުމަތީގެ މަސްރަހު ގޯސްވެ، އެމެރިކާ އާއި އިޒްރޭލް ގުޅިގެން އީރާނަށް ހަމަލާދޭން އިއްޔެ ފެށުމާ އެކު، މެދުއިރުމަތީގައި ބޮޑު ހަނގުރާމައެއް ފެށިދާނެ ކަމުގެ ބިރުވެރިކަން ވަނީ އުފެދިފަ އެވެ. އެ ހަމަނުޖެހުންތަކާ ގުޅިގެން އިއްޔެ ގިނަ އަދަދެއްގެ ފްލައިޓްތައް ކެންސަލް ކުރުމުން، 1,400 އަށްވުރެ ގިނަ ފަތުރުވެރިން ވަނީ އެއާޕޯޓުގައި ތާށިވެފަ އެވެ.

އެއާޕޯޓުގެ ހާލަތު ބެއްލެވުމަށް ޓޫރިޒަމް މިނިސްޓަރު ތޯރިގް އިބްރާހިމް ރޭ ވަނީ އެއާޕޯޓަށް ވަޑައިގެންފައެވެ. އެއަށްފަހު ޕީއެސްއެމް އަށް ދެއްވި އިންޓަވިއުއެއްގައި މިނިސްޓަރު ވިދާޅުވީ، ނުފުރި ތިބި ފަތުރުވެރިންނަށް އެއާޕޯޓުގައި ފަސޭހައިން ތިބެވޭނެ އިންތިޒާމުތަކެއް މޯލްޑިވްސް އެމްއޭސީއެލުން ހަމަޖައްސާފައިވާ ކަމަށެވެ.

އެގޮތުން، އެމްއޭސީއެލުން ވަނީ ފަތުރުވެރިން ނިދުމަށް ބޭނުންކުރާނެ ސްލީޕިން ބޭގާއި ރާޖަގަނޑު ފަދަ ތަކެތި ފޯރުކޮށްދީފައެވެ. އެއާޕޯޓުގައި ތާށިވި ފަތުރުވެރިން ރޭ މަޑުކޮށްގެން ތިބީ ކުރީގެ ޑޮމެސްޓިކް ޓާމިނަލާއި، ޑޮމެސްޓިކް ޓާމިނަލް ކުރިމަތީގައި ހުންނަ ރެސްޓޯރެންޓުގެ ތިރީގައި ހުންނަ އޭސީ ސަރަހައްދުގަ އެވެ.

މެދުއިރުމަތީގެ ވައިގެ ސަރަހައްދު ބަންދުކުރުމާ ގުޅިގެން ރާއްޖެއަށް އަންނަ ފްލައިޓްތަކަށް ބޮޑެތި ބަދަލުތަކެއް އަންނަމުން ދާއިރު، މިއީ ރާއްޖޭގެ ފަތުރުވެރިކަމަށް ވެސް އޭގެ އަސަރު ފޯރާނެ ކަމެކެވެ.