ނިމިދިޔަ އަހަރު އެކަނިވެސް ރާއްޖެއަށް ތެޔޮ އެތެރެކުރުމަށް 10 ބިލިއަން ރުފިޔާ ހަރަދުކޮށްފައިވާ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ތާރިގު އިބްރާހީމް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، މިއީ ރާއްޖޭގެ ގައުމީ އުފެއްދުންތެރިކަމުގެ (ޖީޑީޕީ) 10 އިންސައްތަ ކަމަށެވެ.
ވަޒީރު ފާހަގަކުރެއްވި ގޮތުގައި ތެލަށް ކުރި މި ބޮޑު ހަރަދަކީ ބޭރު ފައިސާއިން ރާއްޖެއިން ބޭރަށް ދިޔަ ފައިސާއެވެ. އެހެންކަމުން، ތެލަށް ބަރޯސާވާ މިންވަރު ކުޑަކޮށް، ރާއްޖޭގެ ހަކަތައިގެ ދާއިރާ ކުރިއެރުވުމަކީ ސަރުކާރުގެ މުހިއްމު އަމާޒެއް ކަމަށް އޭނާ ވިދާޅުވިއެވެ. މިހާރު ރާއްޖޭގެ މީހުން ދިރިއުޅޭ ރަށްރަށާއި، ރިސޯޓުތަކާއި ސިނާއީ ރަށްތަކުގައި މައިގަނޑު ގޮތެއްގައި ކަރަންޓު އުފައްދަނީ ތެޔޮ ބޭނުންކޮށްގެންނެވެ.
ރާއްޖޭގެ ހަކަތައިގެ ހާލަތާ ގުޅޭ ތަފްސީލު ހިއްސާކުރައްވަމުން ވަޒީރު ވިދާޅުވީ، މީހުން ދިރިއުޅޭ ރަށްރަށުގައި 310 މެގަވޯޓުގެ އިންޖީނު ބޭނުންކުރަމުންދާއިރު، ރިސޯޓުތަކުގައި 298 މެގަވޯޓު އަދި ސިނާއީ ރަށްރަށުގައި 30 މެގަވޯޓުގެ އިންޖީނު ބޭނުންކުރަމުންދާ ކަމަށެވެ. މީހުން ދިރިއުޅޭ ރަށްރަށަށް ކަރަންޓު ދިނުމަށް ދުވާލަކު 7،965 ފީފާ ޑީސަލް ބޭނުންވާއިރު، މިއީ އަހަރަކަށް ބަލާއިރު 2,907,225 ފީފާ ޑީސަލެވެ.
ސަރުކާރުގެ އަމާޒަކީ ރާއްޖޭގެ ކަރަންޓުގެ 33 އިންސައްތައަކީ އިއާދަކުރަނަވި ހަކަތައިން އުފައްދާ ކަރަންޓަށް ހެދުމެވެ.
ވަޒީރު ވިދާޅުވީ މިވަގުތު ހަމައެކަނި އިއާދަކުރަނަވި ހަކަތައިން ކަރަންޓު ދިނުމަކީ ކުރެވޭނެ ކަމެއް ނޫން ނަމަވެސް، އެ މިސްރާބަށް މަސައްކަތް ކުރަމުންދާ ކަމަށެވެ.
"ރައީސް ޑރ. މުޙައްމަދު މުޢިއްޒު ޒައާމަތުގައި ހަކަތައިގެ ސިޔާސަތުގެ އިސްތިރާޖިއްޔާތައް ކަނޑައަޅައި އަޅުގަނޑުމެން މިވަނީ އާއްމުކޮށްފައި. އޭގެ އިތުރަށް ހަކަތައިގެ މަގުޗާޓު ވަނީ އިއުލާނުކުރެވިފައި،" ވަޒީރު ވިދާޅުވިއެވެ.
ރަށްރަށުގެ ހަކަތައިގެ ހިދުމަތް ޔަގީންކުރުމަށްޓަކައި މިހާތަނަށް 115 މެގަވޯޓުގެ ކެޕޭސިޓީގެ 157 ޖަނަރޭޓަރު ރަށްތަކަށް ފޮނުވާފައިވާ ކަމަށްވެސް ވަޒީރު ވިދާޅުވިއެވެ. މީގެ އިތުރުން ރަށްރަށުގެ ކަރަންޓު ވިއުގަ ތަރައްގީކުރުމާއި ބެޓަރީ ސްޓޮރޭޖް އިތުރުކުރުމުގެ މަސައްކަތްތައްވެސް ސަރުކާރުން ދަނީ ކުރަމުންނެވެ.
