މެދުއިރުމަތީގައި މިހާރު ހިނގަމުންދާ ހަނގުރާމައާއި ހަމަނުޖެހުންތަކާ ގުޅިގެން، ރާއްޖެއިން ފުރޭނެ ގޮތެއް ނެތިފައި ތިބި 1,680 ފަތުރުވެރިންނަށް ސަރުކާރުން އެކި ގޮތްގޮތުން އެހީތެރިކަން ފޯރުކޮށްދީފި އެވެ.

މިކަމާ ގުޅޭ ތަފްސީލު ހާމަކުރެއްވީ، މެދުއިރުމަތީގެ ހަމަނުޖެހުންތަކާ ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތައް ހައްލުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފައްދަވާފައިވާ ވަޒީރުންގެ ހާއްސަ ކޮމިޓީން ބޭއްވި ނޫސްވެރިންގެ ބައްދަލުވުމެއްގަ އެވެ.

މި ބައްދަލުވުމުގައި ވާހަކަދައްކަވަމުން މިނިސްޓަރު ތޯރިގު އިބްރާހީމް ވިދާޅުވީ، ހަނގުރާމަ ފެށުނު ދުވަހުން ފެށިގެން ސަރުކާރުން އެންމެ ބޮޑު އިސްކަމެއް ދިނީ ފަތުރުވެރިންނަށް ބޭނުންވާ ހުރިހާ ވަސީލަތްތަކެއް ފޯރުކޮށްދިނުމަށް ކަމަށެވެ. މިގޮތުން، ފަތުރުވެރިންނަށް ބޭނުންވާ މައުލޫމާތު ދިނުމަށް ވެލާނާ އިންޓަނޭޝަނަލް އެއާޕޯޓުގައި ހާއްސަ ޑެސްކެއް ގާއިމުކޮށްފައިވާ ކަމަށާއި، މި މަސައްކަތުގައި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ފަރާތުން ވަރަށް ބޮޑު އެހީތެރިކަމެއް ލިބުނުކަން މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވި ގޮތުގައި، ފުރޭނެ ގޮތެއް ނެތި އެއާޕޯޓުގައި މަޑުކުރަންޖެހުނު ފަތުރުވެރިން ތިބުމަށް ކުރީގެ ޑޮމެސްޓިކް ޓާމިނަލް ވަނީ ހަމަޖައްސައިދީފައެވެ. އެތަނުގައި ފަތުރުވެރިންނަށް ބޭނުންވާ ކެންޓީނުގެ ހިދުމަތް ގާއިމުކޮށް، އެއްފަހަރާ 150 އެއްހާ މީހުންނަށް ނިދޭނެ އިންތިޒާމު ވެސް ހަމަޖެއްސި އެވެ. ގިނަ އަދަދެއްގެ ފަތުރުވެރިން މިހާރު ފުރައިގެން ގޮސްފައިވާއިރު، މިވަގުތު އެތަނުގައި ތިބީ 12 ވަރަކަށް މީހުން ކަމަށް މިނިސްޓަރު ވިދާޅުވި އެވެ.

ރާއްޖޭގެ ފަތުރުވެރިކަމުގެ މާކެޓަށް މިކަމުން ކުރާނެ އަސަރުތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، ރާއްޖެއަށް އަންނަ ފަތުރުވެރިންގެ 30 އިންސައްތައަކީ މެދުއިރުމަތީގެ ސަރަހައްދުން އަންނަ މީހުން ކަމަށެވެ. އެހެންކަމުން، ދަތުރުފަތުރުގެ ދަތިކަން ހައްލުކުރުމަށްޓަކައި އެހެން ސަރަހައްދުތަކުން ރާއްޖެއަށް އެއާލައިންތައް ގެނެވޭނެ ގޮތްތައް ހޯދަމުންދާ ކަމަށް އޭނާ ވިދާޅުވި އެވެ. ހާއްސަކޮށް ރަޝިއާ، ޗައިނާ އަދި އިންޑިއާއިން އިތުރު ފްލައިޓުތައް ގެނައުމަށް މަސައްކަތް ކުރަމުންދާ ކަމަށާއި، ބައެއް ގައުމުތަކުގެ އެމްބަސީތަކާ ގުޅިގެން ރާއްޖެ އިތުރަށް މާކެޓް ކުރުމުގެ މަސައްކަތް ވެސް ކުރިއަށްދާ ކަމަށް މިނިސްޓަރު ވިދާޅުވި އެވެ.

މީގެ އިތުރުން، މި ދަނޑިވަޅުގައި ރާއްޖެައަށް އަންނަން ބުކިން ހަދާފައިވާ ފަރާތްތަކުން ދަތުރު ކެންސަލްކުރަން ބޭނުންނަމަ، އިތުރު ޗާޖަކާ ނުލައި ރީބުކް ކުރެވޭނެ އިންތިޒާމު މިހާރު ވަނީ ހަމަޖައްސާފަ އެވެ.

މިނިސްޓަރު ތޯރިގު ވަނީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން، މިނިސްޓްރީން ދޭ އިރުޝާދުތަކާ އެއްގޮތަށް ފަތުރުވެރިންނަށް މައުލޫމާތު ފޯރުކޮށްދިނުމަށް ބާރުއަޅުއްވާފަ އެވެ.